நூறு கோடி ரூபாய் நில மோசடி வழக்கில் கைது செய்யப்பட்ட அதிமுக முன்னாள் அமைச்சர் விஜயபாஸ்கரை இரண்டு நாள் காவலில் வைத்து விசாரணை செய்ய சிபிசிஐடி போலீசாருக்கு கரூர் நீதிமன்றம் அனுமதி வழங்கியுள்ளது.
கரூரில் பிரகாஷ் என்பவருக்கு சொந்தமான நூறு கோடி ரூபாய் நிலத்தை அபகரித்த வழக்கில், எம்ஆர் விஜயபாஸ்கரை சிபிசிஐடி போலீசார் கைது செய்து, திருச்சி மத்திய சிறையில் அடைத்தனர்.
இதேபோல, மற்றொரு வழக்கிலும் அவர் கைது செய்யப்படுள்ளார். இந்நிலையில், எம்.ஆர்.விஜயபாஸ்கர் ஜாமீன் கோரிய மனு கரூர் முதலாவது குற்றவியல் நடுவர் மன்றத்தில் விசாரணைக்கு வந்தது.
அப்போது, நீதிமன்றத்தில் ஆஜர்படுத்தப்பட்ட எம்.ஆர்.விஜயபாஸ்கரிடம் விசாரணை நடத்த 7 நாள் போலீஸ் காவல் வழங்க சிபிசிஐடி போலீசார் கோரிக்கை வைத்தனர்.
ஆனால், இரண்டு நாள் மட்டும் விசாரணை நடத்த நீதிமன்ற நடுவர் பரத்குமார் அனுமதி வழங்கி உத்தரவிட்டார்.
