அடுத்த 50 ஆண்டுகளில் இந்தியாவில் முஸ்லிம் மக்கள்தொகை 57சதவீதம் அதிகரிக்கும் என்று ஒரு புதிய ஆய்வு அறிக்கையில் தெரிவிக்கப்பட்டுள்ளது. இதன் பின்னணி என்ன? என்பது பற்றிய ஒரு செய்தி தொகுப்பு.
அமெரிக்காவை சேர்ந்த பியூ ஆராய்ச்சி மையம் ‘உலக மதங்களின் எதிர்காலம்: மக்கள் தொகை வளர்ச்சி கணிப்புகள், 2020–2070’ என்ற தலைப்பில் ஒரு ஆய்வறிக்கையை வெளியிட்டுள்ளது.
201 நாடுகள் மற்றும் பிரதேசங்களில் வயது, கருவுறுதல், இறப்பு, இடம்பெயர்வு மற்றும் மதம் மாறுதல் குறித்த தரவுகளைப் பயன்படுத்தி ஏழு மதப் பிரிவுகளை இந்த மையம் ஆய்வு செய்துள்ளது.
இந்த ஆய்வறிக்கையில் உலகெங்கிலும் உள்ள முஸ்லிம்களின் எண்ணிக்கை 2020 முதல் 2070-ஆம் ஆண்டுக்குள் 80 சதவீதம் அதிகரிக்கும் என்றும், உலகின் அதிக மக்கள்தொகை கொண்ட மதமான கிறிஸ்துவத்தை பின்னுக்குத் தள்ளி, 2035-க்குள் இஸ்லாம் முதலிடத்தை பிடிக்கும் என்றும் தெரிவிக்கப்பட்டுள்ளது.
2070-க்குள் பாகிஸ்தானை அடுத்து உலகின் இரண்டாவது மிகப்பெரிய முஸ்லிம் மக்கள் தொகை கொண்ட நாடாக இந்தியா இருக்கும் என்று கூறப்பட்டுள்ளது.
2020 முதல் 2070 வரையிலான காலகட்டத்தில் இந்தியாவில் இந்துக்களின் எண்ணிக்கை சுமார் 17.6 கோடி அதிகரிக்கும் என எதிர்பார்க்கப்படுகிறது. இருப்பினும், மொத்த மக்கள்தொகையில் இந்துக்களின் பங்கு 79 சதவீதத்திலிருந்து 76 சதவீதமாகக் குறையக்கூடும் என்று கூறப் பட்டுள்ளது.
இதே காலகட்டத்தில் முஸ்லிம் மக்கள்தொகை 21.3 கோடியிலிருந்து 33.4 கோடியாக சுமார் 12.1 கோடி அதிகமாகும் என இந்த ஆய்வில் கணிக்கப்பட்டுள்ளது. இதனால் மொத்த மக்கள்தொகையில் முஸ்லிம்களின் பங்கு சுமார் 15 சதவீதத்திலிருந்து 20 சதவீதமாக உயர வாய்ப்புள்ளது.
முஸ்லிம் பெண்கள் மத்தியில் கருவுறுதல் விகிதம் வேகமாகக் குறைந்து வருவதாகவும், ஆனால் இந்து மற்றும் முஸ்லிம் பெண்களுக்கு இடையிலான கருவுறுதல் விகித இடைவெளி தொடர்ந்து சுருங்கி வருவதாக இந்த ஆய்வறிக்கையில் கூறப்பட்டுள்ளது.
இந்தியாவில் ஒட்டுமொத்த கருவுறுதல் விகிதம் குறைந்திருந்தாலும், இந்துப் பெண்களை விட முஸ்லிம் பெண்கள் சராசரியாக அதிக குழந்தைகளைப் பெற்றுக்கொள்ளும் நிலை தொடர்வதாக இந்த ஆய்வறிக்கை சுட்டிக் காட்டியுள்ளது.
குறிப்பாக முஸ்லிம் மக்கள்தொகை ஒப்பீட்டளவில் வேகமாக வளர்வதற்கு அச்சமூகத்தின் இளைய வயது அமைப்பும் ஒரு முக்கியக் காரணமாகும் எனவும், 2020-ஆம் ஆண்டு தரவுகளின்படி, இந்திய இந்துக்களின் சராசரி வயது 29 ஆக இருந்த நிலையில், முஸ்லிம்களின் சராசரி வயது 24 ஆக இருந்ததாகவும் இந்த அறிக்கை சுட்டிக் காட்டியுள்ளது.
வெவ்வேறு மதங்களை சேர்ந்த பெண்கள் ஒரே எண்ணிக்கையிலான குழந்தைகளைப் பெற்றுக் கொள்ளத் தொடங்கினாலும், கடந்த கால கருவுறுதல் விகித வேறுபாடுகளின் தாக்கம் இன்னும் பல தசாப்தங்களுக்குத் தொடரும் என்று கணிக்கப் பட்டுள்ளது.
இதன் காரணமாகவே, இந்தியாவின் இந்து மக்கள் தொகையை விட முஸ்லிம் மக்கள் தொகை தொடர்ந்து வேகமாக வளரும் என்று இந்த ஆய்வறிக்கையில் கணிக்கப்பட்டுள்ளது.
மக்கள் தொகை தொடர்பான அனுமானங்களின் அடிப்படையில் அமைந்த இந்த அறிக்கை வெறும் கணிப்புகள் மட்டுமே; அவை நிச்சயமாக நடக்கப்போகும் நிகழ்வுகள் அல்ல என்பது குறிப்பிட்டத்தக்கது.
















