சபரிமலை ஐயப்பன் கோயிலில் மண்டல சீசன் தொடங்கியுள்ள நிலையில், பக்தர்கள் வருகை அதிகரித்து வருவதால் தினசரி தரிசன அனுமதி 85 ஆயிரமாக உயர்த்தப்பட்டுள்ளது.
சபரிமலை ஐயப்பன் கோயிலில் நடப்பு மண்டல சீசனின் முதல் 6 நாட்களில் சுமார் 2 லட்சத்து 75 ஆயிரம் பக்தர்கள் தரிசனம் செய்துள்ளனர். கடந்த ஆண்டு இதே காலகட்டத்தில் 4 லட்சத்து 25 ஆயிரத்துக்கும் மேற்பட்டோர் தரிசனம் செய்த நிலையில், நடப்பாண்டு வருகை குறைந்துள்ளது. இருப்பினும், கடந்த 20ஆம் தேதி 62 ஆயிரம் பேரும், 21ஆம் தேதி 65 ஆயிரம் பேரும் தரிசனம் செய்துள்ளனர்.
பக்தர்கள் வருகை அதிகரிப்பதைத் தொடர்ந்து, 80 ஆயிரமாக இருந்த தினசரி தரிசன அனுமதி 85 ஆயிரமாக உயர்த்தப்பட்டுள்ளது. விர்ச்சுவல் கியூ முன்பதிவிலும் கூடுதலாக 5 ஆயிரம் பக்தர்களுக்கு அனுமதி வழங்கப்பட்டுள்ளது. ஆன்லைனில் முன்பதிவு செய்துவிட்டு தரிசனத்திற்கு வராதவர்கள் மற்றும் டிராவல் ஏஜென்சிகள் மொத்தமாக முன்பதிவு செய்துள்ளனவா என்பது குறித்தும் விசாரணை நடைபெற்று வருகிறது.
மேலும், கூட்ட நெரிசலைத் தவிர்த்து அனைத்து பக்தர்களும் சுமுகமாக தரிசனம் செய்ய தொடர்ந்து பாதுகாப்பு ஏற்பாடுகளை தேவஸ்வம் போர்டும் காவல்துறையும் மேற்கொண்டு வருகிறது.
















