மதுரையில் பலகோடி ரூபாய்க்கு கல்குவாரியில் முறைகேடு நடந்ததாக பதிவு செய்யப்பட்ட வழக்கின் அடிப்படையில், முன்னாள் அமைச்சர் மூர்த்தியின் வீட்டில் காவல்துறையினர் 4 மணி நேரம் சோதனை மேற்கொண்டனர்.
மதுரை மாவட்டம் சத்திரவெள்ளாளப்பட்டியில் குவாரி குத்தகைதாரர் ஒருவர், அனுமதி பெறாத நிலத்திலிருந்து சட்டவிரோதமாக அளவுக்கு அதிகமாக சரளைக் கற்களை வெட்டி எடுத்துள்ளதாகவும், இதன் மூலம் அரசுக்கு முறையே 2 கோடியே 32 லட்ச ரூபாய் மற்றும் 3 கோடியே 7 லட்ச ரூபாய் இழப்பு ஏற்பட்டுள்ளதாகவும் கனிமவளத்துறை ஆய்வின் அடிப்படையில் கோட்டாச்சியர் அறிக்கை அளித்துள்ளார். இதன் அடிப்படையில் மாவட்ட மத்திய குற்றப்பிரிவு காவல் துறையினர் கடந்த 2019 – 2024 ஆண்டுகளில் முறைகேடு நடந்துள்ளதாக முன்னாள் அமைச்சர் மூர்த்தி உள்ளிட்டோர் மீது வழக்கு பதிவு செய்தனர். இந்த வழக்கு தொடர்பாக முன்னாள் அமைச்சர் மூர்த்தியின் வீட்டில் மத்திய குற்றப்பிரிவு காவல்துறையினர் 4 மணி நேரம் சோதனை நடத்தினர். அப்போது கனிம வளம் வெட்டி எடுக்கப்பட்டதற்கான ஆவணங்கள் உள்ளதா என ஆய்வு மேற்கொள்ளப்பட்டது. அப்போது அங்கு திமுகவினர் குவிந்ததால் பரபரப்பு நிலவியது.
மத்திய குற்றப்பிரிவு போலீசாரின் சோதனை குறித்து பேசிய திமுக முன்னாள் அமைச்சர் மூர்த்தி , தனக்கு சொந்தமான நிலத்தில் மாவட்ட நிர்வாகத்திடம் ஒப்பந்தம் பெறப்பட்டே குவாரி தொழில் செய்ததாகவும் அரசின் வழிகாட்டு விதிமுறைக்கு உட்பட்டு செம்மண் எடுத்ததாகவும் விளக்கமளித்தார். வெட்டி எடுக்கப்பட்ட அனைத்து கனிம வளத்திற்கான தொகையும் முறையாக செலுத்தப்பட்டும் என் மீது ஏன் வழக்குப்பதிவு செய்தார்கள் எனவும் அவர் கேள்வி எழுப்பினார்.
















