கோட்டயம் மாவட்டத்தின் கிழக்கு மலைப் பகுதியில் பெய்த கனமழையால் இரண்டு இடங்களில் நிலச்சரிவு ஏற்பட்டது.
கேரளாவில் கடந்த சில நாட்களாக கனமழை பெய்துவருகிறது. இதனால், சில மாவட்டங்களுக்கு மஞ்சள் எச்சரிக்கை விடுக்கப்பட்டிருந்தது.
இந்நிலையில், கோட்டயம் மாவட்டத்தின் கிழக்கு மலைப் பகுதியில் பெய்த கனமழையால் வெள்ளணி, தலைநாடு ஆகிய இடங்களில் நிலச்சரிவு ஏற்பட்டது. இதனால் அப்பகுதியில் உள்ள சாலை முழுவதும் பாறாங்கற்கள் மற்றும் சேறு நிறைந்து காணப்பட்டது.
இதேபோன்று, கோட்டயம் மாவட்டம் வாகமன் வீதியில் மண்சரிவு ஏற்பட்டது. இதனால், ஈரட்டுப்பேட்டை-வாகமன் வழித்தடத்தில் வாகன போக்குவரத்துக்கு தடை விதிக்கப்பட்டுள்ளது. நிலச்சரிவு ஏற்பட்ட பகுதியில் மக்கள் வசிக்காததால் அதிர்ஷ்டவசமாக உயிர்ச்சேதம் எதுவும் ஏற்படவில்லை.
வெள்ளிக்குளம் பகுதியில் ஏற்பட்ட நிலச்சரிவால் இரண்டு வீடுகளின் சுவர்கள் இடிந்து விழுந்தன. மேலும், சத்தப்புழா பகுதியில் சில வீடுகளில் மழை நீர் புகுந்தது. ஆனைப்பிலவு பகுதியில் கார் ஒன்று வெள்ளத்தில் சிக்கியது.
கோட்டயம் சுற்றுவட்டாரப் பகுதிகளில் பெய்த கனமழையின் காரணமாக, ஆறுகளில் வெள்ளப்பெருக்கு ஏற்பட்டிருக்கிறது.
கோட்டயம் மாவட்டத்தில் மழையால் பாதிக்கப்பட்டுள்ள பகுதிகளை மாவட்ட ஆட்சியர் மற்றும் அதிகாரிகள் நேரில் சென்று பார்வையிட்டனர். தொடர் மழையின் போது மலைப்பகுதிகளுக்குச் செல்ல வேண்டாம் என்று மாவட்ட ஆட்சியர் விக்னேஷ்வரி அறிவுறுத்தியுள்ளார்.
