உலகக்கோப்பை கிரிக்கெட் : ஆப்கானிஸ்தான் வெற்றி !

ஒரு நாள் உலகக்கோப்பை கிரிக்கெட் தொடரின் 22 வது லீக் போட்டியில் பாகிஸ்தான் அணியை வீழ்த்தி ஆப்கானிஸ்தான் வெற்றிப் பெற்றது.

ஒரு நாள் உலகக்கோப்பை கிரிக்கெட் தொடர் இந்தியாவில் நடைபெற்று வருகிறது. இதில் 22 வது லீக் போட்டி சென்னையில் பாகிஸ்தான் மற்றும் ஆப்கானிஸ்தான் அணிகளுக்கு இடையே நடைபெற்றது.

இதில் டாஸ் வென்ற பாகிஸ்தான் அணியின் கேப்டன் பாபர் ஆசாம் பேட்டிங்யை தேர்வு செய்தார். அதன்படி பாகிஸ்தான் அணியின் தொடக்க வீரர்களாக அப்துல்லா ஷபீக் மற்றும் இமாம்-உல்-ஹக் களமிறங்கினர்.

இதில் இமாம்-உல்-ஹக் 10 வது ஓவரில் 22 பந்துகளில் 17 ரன்களை அடித்து ஆட்டமிழந்தார். அடுத்து சிறப்பாக விளையாடி வந்த அப்துல்லா ஷபீக் 5 பௌண்டரீஸ் மற்றும் 2 சிக்சர்கள் என மொத்தமாக 75 பந்துகளில் 58 ரன்களை எடுத்து ஆட்டமிழந்தார்.

இவர்களை தொடர்ந்து பாகிஸ்தான் அணியின் கேப்டன் பாபர் ஆசாம் மற்றும் முகமது ரிஸ்வான் ஆகியோர் களமிறங்கினர். இதில் முகமது ரிஸ்வான் 10 பந்துகளில் 8 ரன்களை மட்டுமே எடுத்து ஆட்டமிழந்தார். இவரை தொடர்ந்து களமிறங்கிய சவுத் ஷகீல் 3 பௌண்டரீஸ் உடன் 34 பந்துகளில் 25 ரன்களை எடுத்து ஆட்டமிழந்தார்.

இவரைத் தொடர்ந்து ஷதாப் கான் களமிறங்கினார். ஷதாப் கான் மற்றும் பாபர் ஆசாம் இணை சிறப்பாக விளையாடி வந்த நிலையில் 41 வது ஓவரில் பாபர் ஆசாம் 4 பௌண்டரீஸ் மற்றும் 1 சிக்சர் அடித்து 92 பந்துகளில் 74 ரன்களை எடுத்து ஆட்டமிழந்தார்.

இவரைத் தொடர்ந்து களமிறங்கிய இப்திகார் அகமது சிறப்பாக விளையாடி வந்த நிலையில் 2 பௌண்டரீஸ் மற்றும் 4 சிக்சர்கள் அடித்து 27 பந்துகளில் 40 ரன்கள் எடுத்து ஆட்டமிழந்தார். ஷதாப் கான் 38 பந்துகளில் 40 ரன்களை எடுத்து ஆட்டமிழந்தார்.

அதிகபட்சமாக ஆப்கானிஸ்தான் அணியில் நூர் அகமது 3 விக்கெட்களும், நவீன்-உல்-ஹக் 2 விக்கெட்களும், முகமது நபி மற்றும் அஸ்மத்துல்லா உமர்சாய் தலா 1 விக்கெட்டும் வீழ்த்தினர். இதனால் பாகிஸ்தான் அணி 50 ஓவர்கள் முடிவில் 7 விக்கெட்கள் இழப்பிற்கு 282 ரன்களை எடுத்தது.

இதைத் தொடர்ந்து 283 ரன்கள் எடுத்தால் வெற்றி என்ற இலக்குடன் ஆப்கானிஸ்தான் அணியின் தொடக்க வீரர்களாக ரஹ்மானுல்லா குர்பாஸ் மற்றும் இப்ராஹிம் சத்ரான் களமிறங்கினர்.

இதில் ரஹ்மானுல்லா குர்பாஸ் 53 பந்துகளில் 65 ரன்களை எடுத்து ஆட்டமிழக்க, இப்ராஹிம் சத்ரான் 113 பந்துகளில் 87 ரன்கள் அடித்து ஆட்டமிழந்தார்.

இவர்களை தொடர்ந்து ரஹ்மத் ஷா மற்றும் ஹஷ்மத்துல்லா ஷாஹிதி களமிறங்கினர். இருவரும் சிறப்பாக விளையாடி கடைசி வரை ஆட்டமிழக்காமல் அணியை வெற்றி பாதைக்கு அழைத்து சென்றனர். இதில் ரஹ்மத் ஷா 84 பந்துகளில் 77 ரன்களும், ஹஷ்மத்துல்லா ஷாஹிதி 45 பந்துகளில் 48 ரன்களும் அடித்தனர்.

பாகிஸ்தான் அணியில் அப்ரிடி மற்றும் ஹசன் அலி ஆகியோர் தலா 1 விக்கெட்டை வீழ்த்தினர். மேலும் இந்த போட்டியில் ஆட்டநாயகன் விருது 87 ரன்களை அடித்த இப்ராஹிம் சத்ரான்னுக்கு வழங்கப்பட்டது.