சபரிமலை செல்லும் ஐயப்ப பக்தர்களின் வசதிக்காக, டிசம்பர் 15-ஆம் தேதி முதல் சென்னை சென்ட்ரலில் இருந்து கோட்டயத்துக்கு வந்தே பாரத் சிறப்பு இரயில் இயக்கப்பட உள்ளதாக தெற்கு இரயில்வே அறிவித்துள்ளது.
உலகப் புகழ் பெற்ற சபரிமலை ஐயப்பன் திருக்கோவிலுக்கு, கேரளா மட்டுமல்லாது தமிழகம் உள்ளிட்ட பல்வேறு மாநிலங்களிலிருந்தும், பக்தர்கள் மாலை அணிந்து, இருமுடி கட்டிச் சென்று சுவாமி தரிசனம் செய்து வருகின்றனர்.
சபரிமலை ஐயப்ப சுவாமி திருக்கோவிலில், மண்டலக் காலத்தையொட்டி, மகரவிளக்கு பூஜைக்காகக் கடந்த நவம்பர் மாதம் 16-ஆம் தேதி கோவில் நடை திறக்கப்பட்டது. இதனையொட்டி, ஏராளமான பக்தர்கள் இருமுடி கட்டி சுவாமி தரிசனம் செய்து வருகின்றனர்.
பக்தர்களின் வசதிக்காக, தெற்கு இரயில்வே சார்பில் சிறப்பு இரயில்கள் இயக்கப்படுகின்றன. அந்த வகையில், சென்னை சென்ட்ரலில் இருந்து வருகிற 15, 17, 22 மற்றும் 24 ஆகிய தேதிகளில் அதிகாலை 4:30 மணிக்கு புறப்படும் வந்தே பாரத் சிறப்பு இரயில் (வண்டி எண் – 06151), மாலை 4:15 மணிக்கு கோட்டயம் சென்றடையும்.
கோட்டயத்தில் இருந்து வருகிற 16, 18, 23 மற்றும் 25 ஆகிய தேதிகளில் அதிகாலை 4:40 மணிக்கு புறப்படும் வந்தே பாரத் சிறப்பு இரயில் (வண்டி எண் – 06152), மாலை 5:15 மணிக்கு சென்னை சென்ட்ரல் வந்தடையும்.
இந்த வந்தே பாரத் சிறப்பு இரயில் காட்பாடி, சேலம், பாலக்காடு, ஆலுவா உள்ளிட்ட இரயில் நிலையங்களில் நின்று செல்லும் என்று தெற்கு இரயில்வே தெரிவித்துள்ளது.
