வாழ்வா ? சாவா ? என்ற நிலையில் உள்ளோம் – ஹாக்கி மகளிர் அணி கேப்டன்!

ஒலிம்பிக் போட்டியில் தகுதி சுற்று ஜனவரி 13 ஆம் தேதி தொடங்கவுள்ளதைக் குறித்து இந்தியப் பெண்கள் ஹாக்கி அணியின் கேப்டன் சவிதா கூறியுள்ளார்.

2024-ம் ஆண்டு ஒலிம்பிக் போட்டி பிரான்ஸ் தலைநகர் பாரிஸில் நடைபெற உள்ளது. இதில் மகளிர் ஹாக்கி போட்டிக்கான தகுதி சுற்று வரும் ஜனவரி 13 முதல் 19ஆம் தேதி வரை ராஞ்சியில் நடைபெற உள்ளது.

இதில் மொத்தம் 8 அணிகள் கலந்து கொள்கின்றன. ‘பி’பிரிவில் இந்தியா, நியூசிலாந்து, இத்தாலி, அமெரிக்கா அணிகள் இடம் பெற்றுள்ளன. ‘ஏ’ பிரிவில் ஜெர்மனி, ஜப்பான், சிலி, செக் குடியரசு ஆகிய அணிகள் உள்ளன.

இந்திய அணி தனது முதல் போட்டியில் ஜனவரி 13ஆம் தேதி அமெரிக்காவுடன் விளையாடுகிறது. 14ஆம் தேதி நியூசிலாந்துடனும், 16ஆம் தேதி இத்தாலியுடனும் விளையாடவுள்ளது.

முதல் 3 இடங்களைப் பிடிக்கும் அணிகள் பாரிஸ் ஒலிம்பிக் போட்டிக்குத் தகுதி பெறும். இதனால் இந்திய மகளிர் அணிக்கு இந்த தொடர் முக்கியத்துவம் வாய்ந்ததாக அமைந்துள்ளது.

தகுதி சுற்றுப் போட்டிகள் நடைபெறும் ஜார்கண்ட் மைதானத்தில், இதற்கு முன்னர் நடைபெற்ற ஆசிய சாம்பியன்ஸ் கோப்பை தொடரில் இந்திய அணி சாம்பியன் பட்டம் வென்றது.

இந்நிலையில் இது எங்களுக்கு வாழ்வா சாவா என்ற ஆட்டம் என்று இந்தியப் பெண்கள் ஹாக்கி அணியின் கேப்டன் சவிதா கூறியுள்ளார்.

இது குறித்து அவர், “நமது அணி மிகவும் உற்சாகமாக உள்ளது. ஜார்கண்டில் சில நல்ல பயிற்சிகள் எங்களுக்குக் கிடைத்துள்ளன. குறிப்பாக ஆசிய சாம்பியன்ஸ் கோப்பையை வென்றது அணிக்குக் கூடுதல் உத்வேகத்தை அளித்துள்ளது. நாங்கள் இதற்காகக் கடுமையான பயிற்சிகளுடன் தயாராகி உள்ளோம்.

மேலும் கடந்த காலங்களில் ஒலிம்பிக் தகுதி சுற்றுப் போட்டிகளில் விளையாடிய அனுபவம் கொண்ட வீராங்கனைகள் அணியில் உள்ளார்கள். அவர்கள் மூலம் இந்த தொடரில் எவ்வாறு செயல்பட்டால் வெற்றி பெற முடியும் என்பதை நாங்கள் கற்றுள்ளோம். இது எங்களுக்கு வாழ்வா சாவா ஆட்டம் ஆகும். நாங்கள் அதற்குத் தயாராக உள்ளோம்” என்று கூறினார்.