திருப்பரங்குன்றம் மலை உச்சியில் தீபம் ஏற்ற அனுமதி வழங்கிய உயர்நீதிமன்ற மதுரை அமர்வு உத்தரவுக்கு எதிராக, உச்சநீதிமன்றத்தில் தர்கா நிர்வாகம் மேல்முறையீட்டு மனு தாக்கல் செய்துள்ளது.
மதுரை திருப்பரங்குன்றம் மலை உச்சியில் உள்ள கல் தூணில் கார்த்திகை தீபம் ஏற்ற அனுமதி வழங்கி சென்னை உயர்நீதிமன்ற மதுரை அமர்வு உத்தரவு பிறப்பித்தது.
இதனை எதிர்த்து ஹரத் சுல்தான் சிக்கந்தர் பாட்ஷா அவ்லியா தர்கா நிர்வாகம் உச்சநீதிமன்றத்தில் மேல்முறையீட்டு மனுவைத் தாக்கல் செய்துள்ளது.
அதில், தர்காவுக்குச் சொந்தமான பகுதியில் உரிய நில அளவீடு மேற்கொள்ளாமல், மலை உச்சியில் உள்ள கல் தூண் அமைந்திருக்கும் பகுதி கோயிலுக்குச் சொந்தமானது என கருதி தீபம் ஏற்ற அனுமதி வழங்கியிருப்பது முறையற்றது என தெரிவிக்கப்பட்டுள்ளது.
திருப்பரங்குன்றம் மலை உச்சியில் உள்ள தீப மண்டபத்தில் மட்டுமே இதுவரை கார்த்திகை தீபம் ஏற்றப்பட்டு வந்துள்ளதாகவும், கல் தூணில் தீபம் ஏற்றுவது புதிய வழிபாட்டு நடைமுறையை உருவாக்குவதாக அமையும் என்றும் தர்கா நிர்வாகம் தெரிவித்துள்ளது.
திருப்பரங்குன்றம் மலை இந்திய தொல்லியல் துறையின் பாதுகாக்கப்பட்ட நினைவுச்சின்னப் பகுதியாக இருப்பதால், உரிய பாதுகாப்பு ஏற்பாடுகள் மற்றும் நில எல்லை வரையறை இல்லாமல் தீபம் ஏற்ற உத்தரவிட்டிருப்பது தர்காவின் உரிமைகளைப் பாதிக்கும் என்றும் மனுவில் கூறப்பட்டுள்ளது. இந்த மனு விரைவில் விசாரணைக்கு வரும் என்று எதிர்பார்க்கப்படுகிறது.
