சிலை கடத்தல் வழக்கு தொடர்பான முக்கிய ஆவணங்கள், கோப்புகள் மாயமான விவகாரத்தில் தமிழக அரசு எடுத்து வரும் நடவடிக்கைகள் எந்த விதத்திலும் திருப்தி அளிக்கும் வகையில் இல்லை என உச்சநீதிமன்றம் காட்டமாக விமர்சித்துள்ளது.
ஓய்வுபெற்ற ஐபிஎஸ் அதிகாரி பொன்.மாணிக்கவேல் தலைமையில் விசாரணை நடைபெற்றபோது, சிலை கடத்தல் வழக்குகளின் விசாரணை அறிக்கைகள், சாட்சியங்கள் மற்றும் ஆவணங்கள் மாயமானதாகப் புகார் எழுந்தது. இது தொடர்பாக வழக்கறிஞர் யானை ராஜேந்திரன் உச்சநீதிமன்றத்தில் மேல்முறையீட்டு மனுதாக்கல் செய்தார்.
இந்த மனு நீதிபதிகள் பி.வி. நாகரத்னா, ஆர். மகாதேவன் அமர்வில் விசாரணைக்கு வந்தது.
அப்போது தமிழக அரசு தரப்பில், 41 ஆவணங்கள் மாயமானது குறித்து விசாரணை நடைபெற்று வருவதாகவும், 21 பழமையான சிலைகள் மீட்கப்பட்டுள்ளதாகவும் தெரிவிக்கப்பட்டது.
இதற்கு அதிருப்தி தெரிவித்த நீதிபதிகள், மீட்கப்பட்ட சிலைகள் யாரிடமிருந்து கைப்பற்றப்பட்டன என்றும், தற்போது சிலைகள் எங்கு பாதுகாக்கப்படுகின்றன எனவும் கேள்வி எழுப்பினர்.
சிலை கடத்தல் வழக்கு தொடர்பான முக்கிய ஆவணங்கள், கோப்புகள் மாயமான விவகாரத்தில் தமிழக அரசு எடுத்து வரும் நடவடிக்கைகள் எந்த விதத்திலும் திருப்தி அளிக்கும் வகையில் இல்லை எனவும் அதிருப்தி தெரிவித்தனர்.
மேலும், மாயமான ஆவணங்களை மீட்க எடுக்கப்பட்ட நடவடிக்கைகள், மீட்கப்பட்ட சிலைகளின் விவரங்கள், கைது செய்யப்பட்டவர்களின் பட்டியல் மற்றும் சிலைகள் பாதுகாக்கப்படும் இடங்கள் குறித்த விரிவான அறிக்கையை தமிழக அரசு தாக்கல் செய்ய வேண்டும் என உத்தரவிட்டனர். இதனை அடுத்து, வழக்கின் விசாரணையை டிசம்பர் 2-ஆம் தேதிக்கு ஒத்திவைத்தனர்.
