கிருஷ்ணகிரி மாவட்டம் ஓசூர் அருகே தனியார் தொழிற்சாலைக்கான புதிய கட்டடம் கட்டுமான பணியின் போது கான்கிரீட் தளம் இடிந்து விழுந்ததில் 3 தொழிலாளர் பரிதாபமாக உயிரிழந்தனர்.
ஓசூர் மாநகராட்சிக்குட்பட்ட வேடரப்பள்ளி பகுதியில் இயங்கி வரும் தனியார் வாகன உதிரிபாகங்கள் தயாரிக்கும் நிறுவன வளாகத்தில், கடந்த ஒரு வாரமாகப் புதிய கட்டட கட்டுமானப் பணிகள் நடைபெற்று வந்தன. இந்நிலையில் ஆர்ச் வடிவிலான மேற்கூரைக்கு கான்கிரீட் அமைக்கும் பணியில் சுமார் 17 தொழிலாளர்கள் ஈடுபட்டிருந்தனர். அப்போது, முட்டுக் கொடுக்கப்பட்டிருந்த ஜாக் திடீரென நழுவியதால், கண்ணிமைக்கும் நேரத்தில் கான்கிரீட் மற்றும் இரும்பு கம்பிகளாலான கட்டமைப்பு, தொழிலாளர்கள் மீது சரிந்து விழுந்தது. இந்த விபத்தில் இடிபாடுகளில் சிக்கி 3 தொழிலாளர்கள் சம்பவ இடத்திலேயே உயிரிழந்தனர். சுமார் 10 தொழிலாளர்கள் காயங்களுடன் உயிர்தப்பினர். தகவலறிந்து ஓசூர் சார் ஆட்சியர் அக்ருதி சேத்தி, ஒசூர் டிஎஸ்பி சுதிர் மற்றும் சிப்காட் காவல்துறையினர், தீயணைப்பு மற்றும் மீட்புப் படையினர் சம்பவ இடத்திற்கு விரைந்து வந்து நேரில் ஆய்வு செய்து மீட்பு பணிகளை துரிதப்படுத்தினர்.
