காஷ்மீர் அதன் இயற்கை அழகால் உலக மக்களை கவர்ந்துள்ளது. தற்போது காஷ்மீரி மொழி அதன் வளமான பாரம்பரியம் மற்றும் இலக்கியம் ஆகியவற்றால் புகழ் பெற தொடங்கியுள்ளது. மைக்ரோசாப்ட் மொழிபெயர்ப்புக்கு பிறகு தற்போது கூகுள் டிரான்ஸ்லேட் தளத்தில் காஷ்மீரி மொழி சேர்க்கப்பட்டுள்ளது. இதனையடுத்து காஷ்மீரி மொழியின் மகத்துவம் உலகம் முழுவதும் உள்ள மக்களை சென்று சேரவுள்ளது.
காஷ்மீர் பூர்வீக மக்களில் 5 சதவீதம் பேர் மட்டுமே காஷ்மீரி எழுத்துக்களை எழுத முடியும் என்று சமீபத்திய ஆய்வு ஒன்று தெரிவித்துள்ளது. மைக்ரோசாப்ட் மற்றும் கூகுள் மொழிபெயர்ப்பில் அந்த மொழி இணைந்துள்ளதால் உலகம் முழுவதிலும் உள்ள மக்கள் காஷ்மீரி இலக்கியங்களை அணுக உதவும்.
ஒரு மொழி எப்போதும் அதன் இலக்கியத்தால் அங்கீகரிக்கப்படுகிறது. மேலும் காஷ்மீரி மொழியைப் பொறுத்தவரை, இது உலகின் பழமையான மொழிகளில் ஒன்றாகும். ஷமாஸ் ஃபக்கீர், லாலா டெட், ஷேக் உல் ஆலம் மற்றும் ரசூல் மிர் போன்ற இலக்கிய ஆளுமைகள் காஷ்மீரில் உள்ளனர்.
கூகுள் காஷ்மீரி மொழியைச் சேர்ப்பது எங்களின் பல படைப்புகள் மற்றும் இலக்கியங்களை பிற மொழிகளில் மாற்ற உதவும். இதனை வரவேற்கிறோம். காஷ்மீரி இலக்கியத்தில் ஆர்வமுள்ளவர்கள் அதை எளிதாகக் கண்டுபிடிப்பார்கள் என்று காஷ்மீரி கவிஞர் அப்துல் ஹமீத் நசீர் தெரிவித்துள்ளார்.
டிஜிட்டல் கருவிகளில் காஷ்மீரி மொழியைச் சேர்ப்பது தேசிய மற்றும் சர்வதேச அளவில் அதை பிரபலப்படுத்த உதவும். 2020 இல் இந்திய அரசு யூனியன் பிரதேசத்தின் (UT) அதிகாரப்பூர்வ மொழிகள் பட்டியலில் காஷ்மீரியை உள்ளடக்கிய ஜம்மு மற்றும் காஷ்மீர் அதிகாரப்பூர்வ மொழிகள் மசோதா நிறைவேற்றப்பட்டது.
பிராந்திய மொழி என்பது காஷ்மீர் பள்ளத்தாக்குக்கு மட்டுமே சொந்தமானது. தற்போது கூகுளில் சேர்க்கப்பட்டதன் மூலம் அது உலகம் முழுவதும் தனது கரங்களை விரிவுப்படுத்தவுள்ளது.
