சர்வதேச அளவில் நெருக்கடியான சூழல் நிலவினாலும், விவசாயிகளின் நலனே அரசின் முதல் முன்னுரிமை என பிரதமர் மோடி தெரிவித்துள்ளார்.
2026 – 27ஆம் ஆண்டிற்கான குளிர்கால பருவ சாகுபடிக்குத் தேவையான பாஸ்பரஸ், பொட்டாஷ் உரங்களுக்கான மானியத்துக்கு, பிரதமர் மோடி தலைமையிலான மத்திய அமைச்சரவை ஒப்புதல் அளித்தது. குளிர்கால பருவ உர மானியத்திற்காக 62 ஆயிரத்து 370 கோடி ரூபாய் நிதி ஒதுக்கீடு செய்யப்பட்டுள்ளது.
மத்திய அமைச்சரவையின் முடிவை வரவேற்று, பிரதமர் நரேந்திர மோடி தனது சமூக வலைதள பக்கத்தில் கருத்து பதிவிட்டுள்ளார்.
அதில், நம் நாட்டின் விவசாயிகள், எப்போதும் அரசின் முன்னுரிமையாக இருந்து வருகின்றனர் என்றும், உலகளவில் சவாலான சூழ்நிலைகள் நிலவி வரும் போதிலும், விவசாயிகளின் வாழ்க்கைத் தரத்தை மேம்படுத்துவதில் மத்திய அரசு எந்தக் குறையும் வைக்கவில்லை எனவும் தெரிவித்துள்ளார்.
மேலும், சர்வதேச சந்தையில் உரங்களின் விலை உயர்ந்தாலும், அதன் பாதிப்பு விவசாயிகளைச் சென்றடையாமல், நியாயமான விலையில் தடையின்றி உரங்கள் கிடைக்க நடவடிக்கை எடுக்கப்பட்டுள்ளதாகவும் பிரதமர் மோடி கூறியுள்ளார்.
