மேற்கு வங்கத்தில் குடியரசு தலைவர் ஆட்சி நடைமுறைப்படுத்துமாறு தேசிய பட்டியினத்தோர் ஆணையம் ஜனாதிபதிக்கு பரிந்துரை செய்துள்ளது.
மேற்கு வங்க மாநிலம் சந்தேஷ்காளி பகுதியை சேர்ந்த ஆளுங்கட்சி நிர்வாகி ஷாஜகான் ஷேக் மற்றும் அவரின் உதவியாளர்கள் மீது ஊழல் மற்றும் பாலியல் பலாத்காரம் உள்ளிட்ட பல்வேறு புகார்கள் எழுந்தன.
அவரை கைது செய்ய வலியுறுத்தி அப்பகுதியை சேர்ந்த பெண்கள் தொடர் போராட்டத்தில் ஈடுபட்டு வருகின்றனர். அவர்களுக்கு ஆதரவாக அரசியல் கட்சியினர் மற்றும் பெண்கள் போராட்டத்தில் குதித்துள்ளனர்.
இதனையடுத்து அப்பகுதிக்கு பாஜக மாநில தலைவர் சுகந்தா மஜும்தார் நேற்று சென்றபோது போலீசாருடன் தள்ளுமுள்ளு ஏற்பட்டது. இதனையடுத்து அவர் மயங்கி சரிந்தார். அசம்பாவிதங்களைத் தவிர்க்கும் விதமாக, சந்தேஷ்காளி உட்பட ஏழு கிராம பஞ்சாயத்துகளில், வரும் 19ம் தேதி வரை 144 தடை உத்தரவு பிறப்பிக்கப்பட்டுள்ளது.
இந்த சம்பவம் குறித்து விசாரணை நடத்த மத்திய அமைச்சர்கள் மற்றும் எம்பிக்கள் கொண்ட 6 பேர் கொண்ட குழுவை பாஜக அமைத்துள்ளது. உயர்மட்டக் குழுவின் ஒருங்கிணைப்பாளராக மத்திய அமைச்சர் அன்னபூர்ணா தேவி நியமிக்கப்பட்டுள்ளார்.
இந்நிலையில், பா.ஜ.க. குழுவினர் இன்று சந்தேஷ்காளி நோக்கி புறப்பட்டுச் சென்றனர். ஆனால் அவர்களை போலீசார் ராம்பூரில் தடுத்து நிறுத்தினர். இதனால் அங்கு பரபரப்பு ஏற்பட்டது.
இந்த நிலையில் மேற்கு வங்கத்தில் குடியரசு தலைவர் ஆட்சியை அமல்படுத்தக்கோரி ஜனாதிபதியிடம் தேசிய பட்டியலினத்தவர்கள் ஆணையத் தலைவர் அருண் ஹல்தர் அறிக்கை தாக்கல் செய்துள்ளார்.
