இந்தியாவில் நடைபெற்று வரும் புரோ கபடி தொடரில், நேற்றையப் போட்டியில் ஹரியானா ஸ்டீலர்ஸ் –மற்றும் குஜராத் ஜெயண்ட்ஸ் அணிகள் வெற்றி பெற்றன.
இந்தியாவில் உள்ள மாநிலங்களுக்கு இடையே கபடி லீக் தொடர் நடைபெற்று வருகிறது. இதில், மொத்தம் 12 அணிகள் பங்குபெற்று விளையாடி வருகின்றன.
இந்த தொடரில், பெங்கால் வாரியர்ஸ், பெங்களூரு புல்ஸ், தபாங் டெல்லி கே.சி, குஜராத் ஜெயண்ட்ஸ், ஹரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோதாஸ் ஆகிய அணிகள் பங்கேற்றுள்ளன.
நேற்று இரண்டு போட்டிகள் நடைபெற்றது . முதல் போட்டி இரவு 8 மணிக்கு ஹரியானாவில் நடைபெற்றது . இதில் ஹரியானா ஸ்டீலர்ஸ் – யு மும்பா அணிகள் விளையாடின. பரபரப்பாக நடைபெற்ற இந்த போட்டியில் ஹரியானா ஸ்டீலர்ஸ் அணி 46-40 என்ற புள்ளி கணக்கில் யு மும்பா அணியை வீழ்த்தி வெற்றி பெற்றது.
இந்த வெற்றி மூலம் ஆறாவது இடத்தில் இருந்த ஹரியானா ஸ்டீலர்ஸ் அணி ஐந்தாவது இடத்திற்கு முன்னேறியுள்ளது. நேற்று மற்றொரு போட்டி இரவு 9 மணிக்கு நடைபெற்றது. இதில் உ.பி. யோதாஸ் – குஜராத் ஜெயண்ட்ஸ் அணிகள் விளையாடின.
விறுவிறுப்பாக நடைபெற்ற இந்த போட்டியில் குஜராத் ஜெயண்ட்ஸ் அணி 36-29 என்ற புள்ளி கணக்கில் உ.பி. யோதாஸ் அணியை வீழ்த்தி வெற்றி பெற்றது. இந்த வெற்றி மூலம் ஐந்தாவது இடத்தில் இருந்த குஜராத் ஜெயண்ட்ஸ் அணி புள்ளி பட்டியலில் நான்காவது இடத்திற்கு முன்னேறியுள்ளது.
