பிரதமர் மோடி போட்டியிடும் வாரணாசி உட்பட 57 மக்களவை தொகுதிகளில் இன்று மாலையுடன் பிரசாரம் ஓய்ந்தது.
நாடாளுமன்ற தேர்தல் 7 கட்டங்களாக நடைபெறும் என்று தேர்தல் கமிஷன் அறிவித்ததை தொடர்ந்து கடந்த ஏப்ரல் 19ஆம் தேதி 102 தொகுதிகளுக்கு முதல் கட்ட தேர்தல் நடைபெற்றது.
இதனையடுத்து ஏப்ரல் 26ஆம் தேதி மற்றும் மே 7, 13, 20, 25 ஆகிய தேதிகளில் அடுத்தடுத்து 6 கட்ட தேர்தல்கள் நடந்து முடிந்துள்ளன.
இதுவரை 486 தொகுதிகளில் வாக்குப்பதிவு நிறைவடைந்துள்ள நிலையில், 7-வது கட்ட வாக்குப்பதிவு ஜூன் 1ஆம் தேதி நடைபெறவுள்ளது.
உத்தரப்பிரதேசம், மேற்குவங்கம், பீகார், இமாச்சலப்பிரதேசம், ஜார்க்கண்ட், ஒடிசா, பஞ்சாப், சண்டிகார் ஆகிய 8 மாநிலங்களில் 57 தொகுதிகளுக்கு இறுதிகட்ட வாக்குப்பதிவு நடைபெறுகிறது.
பிரதமர் மோடி போட்டியிடும் வாரணாசி தொகுதியில் மத்திய அமைச்சர்கள், பாஜக மூத்த தலைவர்கள் தீவிர வாக்கு சேகரிப்பில் ஈடுபட்டுள்ளனர். ஜூன் 4ஆம் தேதி வாக்கு எண்ணிக்கை நடைபெறுகிறது.
