தமிழ் தேசிய கூட்டமைப்பின் தலைவரும், இலங்கையின் மூத்த எம்பியுமான ரா.சம்பந்தனின் பூதவுடலுக்கு, பாஜக சார்பில் மாநிலத் தலைவர் அண்ணாமலை நேரில் சென்று அஞ்சலி செலுத்தினார்.
கடந்த சில நாட்களாக உடல் நலக்குறைவால் அவதிப்பட்டு வந்த இலங்கை எம்.பி ரா.சம்பந்தன், தலைநகர் கொழும்புவில் உள்ள மருத்துவமனையில் அனுமதிக்கப்பட்டிருந்த நிலையில் சிகிச்சை பலனின்றி உயிரிழந்தார்.
அவரது மறைவுக்கு, இந்திய பிரதமர் மோடி உள்ளிட்ட பல்வேறு அரசியல் கட்சி தலைவர்களும் இரங்கல் தெரிவித்திருந்தனர்.
இந்நிலையில் பொது மக்களின் அஞ்சலிக்காக ரா.சம்பந்தனின் உடல் திருகோணமலையில் உள்ள அவரது இல்லத்தில் வைக்கப்பட்டுள்ளது. இந்நிலையில் அவரது பூதவுடலுக்கு, பாஜக சார்பில் மாநிலத் தலைவர் அண்ணாமலை நேரில் சென்று அஞ்சலி செலுத்தினார்.
மறைந்த சம்பந்தனின் உடல் அரசு மரியாதையுடன் தகனம் செய்யப்படும் எனத் தெரிவிக்கப்பட்டுள்ளது. இதனிடையே இரங்கல் கூட்டத்தில் பேசிய பாஜக மாநிலத் தலைவர் அண்ணாமலை, இலங்கை தமிழர்களின் உரிமைகள் மற்றும் நல்வாழ்வுக்காக ரா.சம்பந்தன் தனது வாழ்நாள் முழுவதையும் அர்ப்பணித்ததை நினைவு கூர்ந்தார்.
