சினிமா துறையில் தற்போதைய அரசின் தலையீடு அதிகமாக உள்ளது! – நடிகர் விஷால்

அரசியல்வாதிகள் நடிகர்கள் ஆகும் பொழுது நடிகர்கள் அரசியல்வாதிகள் ஆவதில் எவ்வித தவறும் இல்லை” என கடலூரில் நடிகர் விஷால் தெரிவித்துள்ளார்.

கடலூர் திருப்பாதிரிப்புலியூர் பகுதியில் நடைபெற்ற மாவட்ட தலைமை ரசிகர் மன்ற நிர்வாகியின் இல்ல சுப நிகழ்வில் நடிகரும், தென்னிந்திய நடிகர் சங்க பொதுச்செயலாளருமான விஷால் கலந்து கொண்டார்.

தொடர்ந்து நிகழ்வில் பங்கேற்ற மக்களுடன் புகைப்படங்களையும் செல்பியையும் எடுத்துக் கொண்டார் பின்னர் செய்தியாளர்களை சந்தித்த அவர்,

பல படங்களில் இரண்டாம் பாகம் தோல்வியடைவது குறித்து கருத்து தெரிவிக்கையில், மக்களின் ரசனைக்கு ஏற்றவாறு படங்கள் இருந்தால் அது நிச்சயம் வெற்றி அடையும் என தெரிவித்தார்.

தொடர்ந்து எதற்காக தமிழ்நாட்டில் மட்டும் இப்படி இரட்டை வரி வசூலிக்கப்படுகின்றது? ஏன் யாருமே இந்த விவரகாரம் குறித்து கேள்வி எழுப்பாமல் உள்ளனர்? இந்த இரட்டை வரி முறையினால் திரையுலகம் மிகவும் மோசமாக பாதிப்பைச் சந்தித்து வருகின்றது என்றார்.

தமிழகத்தில் நடைபெறும் படுகொலைகள் தர்ம சங்கடத்தை ஏற்படுத்துவதாகவும் அரசு கடுமையான நடவடிக்கைகள் மேற்கொண்ட போதும் இதுபோன்ற சம்பவங்கள் நடைபெறுவது வருந்தத்தக்கதாக உள்ளது என தெரிவித்தார்.

தொடர்ந்து அரசியல் பிரவேசம் குறித்த கேள்விக்கு, 70 ஆண்டு காலமாக குடிநீர் இல்லாமல் தமிழகத்தில் ஒரு கிராமம் உள்ளது என்பதை எவ்வகையிலும் ஏற்க முடியாது எனத் தெரிவித்த அவர், அரசியல்வாதிகள் நடிகர்களாகும் பொழுது நடிகர்கள் அரசியல்வாதிகள் ஆவதில் எவ்வித தவறும் இல்லை என தெரிவித்தார்