வங்கதேசத்தில் இந்துக்களுக்கு எதிரான வன்முறையைக் கண்டித்து நாடாளுமன்றத்தில் தீர்மானம் நிறைவேற்ற வேண்டுமென மருத்துவ நிபுணர்கள், எழுத்தாளர்கள், வழக்கறிஞர்கள் உள்ளிட்டோர் வலியுறுத்தினர்.
நாடு முழுவதும் இருந்து பல்வேறு நிபுணர்கள் கையொப்பமிட்டு வெளியிட்டுள்ள கூட்டறிக்கையில், வங்கதேசம் மெஹர்பூரில் உள்ள இஸ்கான் மையம் மற்றும் இந்து கோயில்கள் தீவைத்து எரிக்கப்பட்டதால் தாங்கள் வேதனை அடைந்ததாகவும், அந்நாட்டில் இந்துக்கள் தொடர்ச்சியாக சித்திரவதைக்கு ஆளாவதாகவும் தெரிவித்துள்ளனர்.
வங்கதேசம் தனிநாடாக உருவாகும் வரை, 1971-ஆம் ஆண்டுக்கு முன் ஏறத்தாழ 25 லட்சம் இந்துக்கள் அப்போதைய பாகிஸ்தான் ஆட்சியாளர்களால் கொலை செய்யப்பட்டதாக அறிக்கையில் அவர்கள் சுட்டிக்காட்டியுள்ளனர்.
கடந்த 2013-ஆம் ஆண்டில் இருந்து வங்கதேசத்தில் இந்துக்கள் மீது 3 ஆயிரத்து 600-க்கும் மேற்பட்ட தாக்குதல் சம்பவங்கள் நடைபெற்றதாகவும், தற்போதைய வன்முறை மூலம் நிலைமை மேலும் மோசமடைந்திருப்பதாகவும் அவர்கள் தெரிவித்துள்ளனர்.
வங்கதேசத்தில் இந்துக்களுக்கு எதிரான வன்முறையைக் கண்டித்து நாடாளுமன்றத்தில் ஒருமனதாக தீர்மானம் நிறைவேற்ற வேண்டும் என கேட்டுக்கொண்டுள்ளனர்.
வங்க தேசத்தில் இந்துக்களை பாதுகாக்கும் வகையில், ஐ.நா. உள்ளிட்ட சர்வதேச அமைப்புகள் வாயிலாக அழுத்தம் கொடுத்து, குற்றவாளிகளைக் கடுமையாக தண்டிக்க வேண்டும் என்றும் அறிக்கையில் அவர்கள் வலியுறுத்தியுள்ளனர்.
