திமுக முன்னாள் அமைச்சர் அன்பில் மகேஸை போலீஸ் காவலில் விசாரிக்க அனுமதி கோரிய மனு மீதான உத்தரவை, வரும் 2ம் தேதிக்கு சென்னை ஊழல் தடுப்பு சிறப்பு நீதிமன்றம் தள்ளி வைத்துள்ளது.
ஊழல் குற்றச்சாட்டு வழக்கில் கைது செய்யப்பட்டு சிறையில் அடைக்கப்பட்டுள்ள அன்பில் மகேஸை 5 நாள் காவலில் எடுத்து விசாரிக்க அனுமதி கோரி சென்னை மத்திய குற்றப்பிரிவு போலீசார் சிறப்பு நீதிமன்றத்தில் மனுத்தாக்கல் செய்தனர்.
இந்த மனு, நீதிபதி எல்.எஸ்.சத்தியமூர்த்தி முன்பு விசாரணைக்கு வந்தது.
இதற்காக அன்பில் மகேஸ் நீதிபதி முன்பு ஆஜர்படுத்தப்பட்டார்.
அப்போது சிறையில் சரியான உணவு வழங்காததால் அன்பில் மகேஸ் உடல்நலம் பாதிக்கப்பட்டுள்ளதாக அவரது தரப்பில் தெரிவிக்கப்பட்டது.
காவல்துறை தரப்பில், அன்பில் மகேஸுக்கு சிறையில் உரிய மருத்துவ வசதி செய்து கொடுக்கப்பட்டதாகவும், வீட்டு உணவு கோரிய மனு குறித்து பதிலளிக்க அவகாசம் வேண்டும் என்றும் தெரிவிக்கப்பட்டது.
இதையடுத்து, அன்பில் மகேஸை போலீஸ் காவலில் எடுத்து விசாரிக்க அனுமதி கோரிய மனு மீது நவம்பர் 2-ம் தேதி உத்தரவு பிறப்பிக்கப்படும் என்று நீதிபதி தெரிவித்தார்.
இதற்காக அன்பில் மகேஸை அன்றைய தினம் ஆஜர்படுத்தவும் உத்தரவிட்டு விசாரணையை தள்ளி வைத்தார்.
