பாலியல் வன்கொடுமை செய்யப்பட்டு சட்ட விரோதமாக அடைத்து வைக்கப்பட்டுள்ள சிறுமியை மீட்டுத்தரக்கோரி அவரது தாயார் தாக்கல் செய்த ஆட்கொணர்வு மனு குறித்து காவல்துறை பதிலளிக்க சென்னை உயர் நீதிமன்றம் உத்தரவிட்டுள்ளது.
சென்னை அண்ணா நகரை சேர்ந்த 10 வயது சிறுமியை 16 வயது சிறுவன் பாலியல் வன்கொடுமை செய்ததுடன், பாதிக்கப்பட்ட சிறுமியை சட்டவிரோதமாக அடைத்து வைத்துள்ளதாக கூறப்படுகிறது.
இந்நிலையில் சிறுமியை மீட்டுத்தரக்கோரி அவரது தாயார் சென்னை உயர் நீதிமன்றத்தில் ஆட்கொணர்வு மனு தாக்கல் செய்திருந்தார். இந்த மனு நீதிபதிகள் எஸ்.எம்.சுப்ரமணியம், என்.மாலா அமர்வில் விசாரணைக்கு வந்தது.
அப்போது, பாதிக்கப்பட்ட சிறுமி அவரது பெற்றோருடன் உள்ளதால், ஆட்கொணர்வு மனு விசாரணைக்கு உகந்ததல்ல என கூடுதல் குற்றவியல் வழக்கறிஞர் வாதிட்டார். சிறுமியின் வாக்கமூலத்தின் ஆடியோ இணையத்தில் பரவி வருவதற்கு யார் பொறுப்பு என மனுதாரர் வழக்கறிஞர் கேள்வி எழுப்பினார்.
மேலும், புகார் அளிக்க சென்ற சிறுமியின் பெற்றோர் காவல்துறையால் தாக்கப்பட்டதாகவும் அவர் குற்றம்சாட்டினார். இதனையடுத்து , மனு குறித்து காவல்துறை பதிலளிக்க உத்தரவிட்ட நீதிபதிகள் விசாரணையை செப்டம்பர் 24ஆம் தேதிக்கு ஒத்திவைத்தனர்.
