அரசு ஊழியரின் சொத்துக்கள் மற்றும் கடன்கள் குறித்த விவரங்கள், தனிப்பட்ட விவரங்கள் அல்ல என சென்னை உயர் நீதிமன்றம் திட்டவட்டமாகத் தெரிவித்துள்ளது.
கிருஷ்ணகிரி மாவட்டம், திம்மபுரம் கிராமத்தைச் சேர்ந்த சீனிவாசன் என்பவர், மாவட்ட நீர்வளத்துறை உதவிப்பொறியாளராக பணியாற்றிய காளி பிரியன் என்பவரின் சொத்துக்கள், கடன்கள் உள்ளிட்ட விவரங்களைக் கேட்டு தகவல் அறியும் உரிமை சட்டத்தின் கீழ் விண்ணப்பித்தார்.
ஆனால், அந்த தகவல்கள் அரசு ஊழியரின் தனிப்பட்ட விவரங்கள் எனவும், அவற்றை தகவல் அறியும் உரிமை சட்டத்தின் கீழ் வாங்க முடியாது எனவும் கூறி, மாநில தகவல் ஆணையம் மறுப்பு தெரிவித்து உத்தரவிட்டது.
மாநில தகவல் ஆணையத்தின் உத்தரவை எதிர்த்து சென்னை உயர்நீதிமன்றத்தில் சீனிவாசன் என்பவர் தொடர்ந்த வழக்கு நீதிபதி சி.வி.கார்த்திகேயன் முன்பு விசாரணைக்கு வந்தது.
அப்போது சீனிவாசன் தரப்பில் ஆஜரான வழக்கறிஞர், தகவல் அறியும் உரிமை சட்டம் பிரிவு 8-ன் கீழ் அரசு ஊழியர் பற்றிய தகவல்களை அறிந்துகொள்வது அடிப்படை உரிமை என வாதிட்டார்.
வாதத்தை ஏற்றுக்கொண்ட நீதிபதி அரசு ஊழியரின் சொத்துக்கள் மற்றும் கடன்கள் தனிப்பட்ட விவரங்கள் அல்ல எனவும், அவற்றை பொதுமக்கள் பரிசீலனையில் இருந்து பாதுகாக்க முடியாது எனவும் தெரிவித்தார்.
மேலும், மாநில தகவல் ஆணையம் தகவல்களை வழங்க மறுத்த உத்தரவை ரத்து செய்த நீதிபதி, மனுதாரரின் கோரிக்கையை மீண்டும் பரிசீலித்து 2 மாதங்களில் தகவல்களை வழங்க வேண்டும் என மாநில தகவல் ஆணையத்திற்கு உத்தரவிட்டார்.
