கடலூர் அருகே இளைஞர் கொலை வழக்கில் தேடப்பட்டு வந்த சரித்திரப் பதிவேடு குற்றவாளியை, போலீசார் துப்பாக்கியால் சுட்டுப் பிடித்தனர்.
கடலூர் மாவட்டம் பெரியகாட்டுப்பாளையத்தைச் சேர்ந்த பிருத்விராஜ், தனது நண்பர்களான அருளரசு, அன்பரசு ஆகியோருடன் மது அருந்தியபோது ஏற்பட்ட தகராறில், பீர் பாட்டிலால் குத்திக் கொலை செய்யப்பட்டதாகக் கூறப்படுகிறது. இந்த வழக்கில் தேடப்பட்ட அன்பரசு ஏற்கெனவே கைது செய்யப்பட்ட நிலையில், தப்பியோடிய அருளரசை கடலூர் புதுநகர் போலீசார் தேடி வந்தனர்.
இந்நிலையில், எஸ்.புதூர் பகுதியில் அருளரசைப் பிடிக்க முயன்றபோது, அவர் உதவி ஆய்வாளர் முகிலரசுவைக் கத்தியால் வெட்டிவிட்டு தப்ப முயன்றதாகக் கூறப்படுகிறது. இதையடுத்து, தற்காப்புக்காக காவல் ஆய்வாளர் இளவரசி இரண்டு முறை துப்பாக்கியால் சுட்டதில், அருளரசின் வலது காலில் குண்டு பாய்ந்தது.
இதையடுத்து கைது செய்யப்பட்ட அருளரசும், காயமடைந்த உதவி ஆய்வாளர் முகிலரசுவும் கடலூர் அரசு மருத்துவமனையில் அனுமதிக்கப்பட்டுள்ளனர்.
