சிறுமிகளை பாலியல் வன்கொடுமைக்கு ஆளாக்கியதாக தொழிலதிபர் ஜெம் வீரமணி மீது 8 வழக்குகள் பதிவு செய்யப்பட்ட நிலையில், மேலும் ஒரு சிறுமி புகாரளித்துள்ளார்.
ஜெம் கிரானைட்ஸ் நிறுவன உரிமையாளர் வீரமணி, சிறுமிகளைப் பாலியல் வன்கொடுமை செய்ததாக சென்னை காவல்துறையினர் 8 போக்சோ வழக்குகளை பதிவு செய்துள்ளனர்.
ஜெம் வீரமணி மீது 8 வழக்குகளும், அவருக்கு உடந்தையாக இருந்த சாந்தி மீது 3 வழக்குகளும், மகேந்திரசிம்மன் மீது 2 வழக்குகளும், லாசர் மீது 5 வழக்குகளும், கண்ணன் மீது 2 வழக்குகளும் பதிவு செய்யப்பட்டுள்ளன.
மேலும் சீனிவாசன், சக்திவேல், பாபு, பார்த்திபன் ஆகியோர் தலா ஒரு வழக்கில் கைது செய்யப்பட்டு புழல் மத்திய சிறையில் அடைக்கப்பட்டுள்ளனர்.
இந்நிலையில், தன்னை பாலியல் துன்புறுத்தலுக்கு ஆளாக்கியதாக ஜெம் வீரமணி மீது மற்றொரு சிறுமி புகார் அளித்துள்ளார்.
இதனிடையே ஓட்டுநர் லாசரை ஒரு நாள் போலீஸ் காவலில் எடுத்து விசாரித்ததில், பாலியல் குற்றங்களுக்குப் பயன்படுத்தப்பட்டதாகக் கூறப்படும் வெள்ளை நிற கேம்ரி கார் அடையாளம் காணப்பட்டுள்ளது.
மேலும் பாதிக்கப்பட்ட சிறுமிக்கு 2 லட்ச ரூபாய் நிவாரணத் தொகையை தமிழக அரசு வழங்க, போக்சோ சிறப்பு நீதிமன்றம் உத்தரவிட்டுள்ளது
ஜெம் வீரமணிக்கு எதிராக பதிவு செய்யப்பட்டுள்ள 8 வழக்குகளில், இரண்டு வழக்குகளுக்கான இறுதி அறிக்கை வரும் வாரத்தில் தாக்கல் செய்யப்பட உள்ளது.
