அமெரிக்க இடைக்காலத் தேர்தலில் குடியரசுக் கட்சி அடைந்துள்ள வரலாற்றுத் தோல்விக்கு அதிபர் ட்ரம்ப்பின் அகந்தையும், தவறான முடிவுகளுமே காரணம் என்று கூறப்படுகிறது. அது பற்றிய ஒரு செய்தி தொகுப்பு.
வழக்கமாகவே, அமெரிக்க இடைக்காலத் தேர்தல்களில் அதிபரின் கட்சி தோல்வியைச் சந்திப்பதுதான் மரபு.
1946-ஆம் ஆண்டு முதல் நடந்த 20 இடைக்காலத் தேர்தல்களில், 18-ல் அதிபரின் கட்சி சராசரியாக சுமார் 26 இடங்களை இழந்துள்ளன.
ஜார்ஜ் டபிள்யூ. புஷ் அதிபராக இருந்த 2006-ல் பிரதிநிதிகள் சபையில் 30 இடங்களை இழந்தார். பராக் ஒபாமா அதிபராக இருந்த 2010-ல் 63 இடங்களை இழந்தார். தனது முதல் பதவிக்காலத்தில், 2018 -ல் 41 இடங்களை ட்ரம்ப்பின் குடியரசு கட்சி இழந்தது. எனவே, இந்த ஆண்டு எதிர்கட்சியான ஜனநாயகக் கட்சியினர் பிரதிநிதிகள் சபையைக் கைப்பற்றி, சுமார் 30 இடங்களைக் கூடுதலாகப் பெற்றுள்ளனர். இது ஒன்றும் பெரிய ஆச்சரியமல்ல.
ஆனால் 94 ஆண்டுகளுக்குப் பிறகு கன்சாஸிலும், 34 ஆண்டுகளுக்குப் பிறகு டெக்சாஸிலும், 28 ஆண்டுகளுக்குப் பிறகு தென் கரோலினாவிலும் வெற்றி பெற்றுள்ள ஜனநாயகக் கட்சி, ஓஹியோ, அயோவா மற்றும் வட கரோலினா ஆகிய மாநிலங்களிலும் வெற்றிருப்பதுதான் ஆச்சரியமானதாகும். இவையெல்லாம் ஜனநாயக கட்சியினரே எதிர்பார்க்காத வெற்றியாகும்.
குடியரசுக் கட்சியின் பாரம்பரியக் கோட்டைகளான இந்தத் தொகுதிகளில் ட்ரம்ப், தனது தனிப்பட்ட விசுவாசத்தின் அடிப்படையில் நிறுத்திய பலவீனமான மற்றும் பல்வேறு சர்ச்சைகளில் சிக்கிய வேட்பாளர்களை மக்கள் முற்றிலுமாக நிராகரித்துள்ளனர்.
உதாரணமாக டெக்சாஸில் ட்ரம்ப் தீவிர ஆதரவு அளித்த மாநில அரசு வழக்கறிஞர் கென் பாக்ஸ்டன் மீது ஊழல் மற்றும் அதிகார துஷ்பிரயோகம் போன்ற பல்வேறு குற்றச்சாட்டுகள் உள்ளன. அதேபோல் தென் கரோலினாவில், கடந்த ஜூலை மாதம் மறைந்த செனட்டர் லிண்ட்சே கிரஹாமின் சகோதரி டார்லின் கிரஹாமுக்கு ட்ரம்ப் ஆதரவளித்த நிலையில் அங்கும் ஜனநாயக கட்சி எளிதாக வெற்றிபெற்றுள்ளது.
விவசாயம் சார்ந்த கன்சாஸில், பதவியில் இருந்த ரோஜர் மார்ஷல் ட்ரம்பின் நிர்வாகக் கொள்கைகளைத் தீவிரமாக ஆதரித்ததே அவரது தோல்விக்குக் காரணமாக அமைந்துவிட்டது.
மொத்தத்தில் இந்தத் தேர்தலில், குடியரசுக் கட்சி வேட்பாளர்கள் ட்ரம்பிடமிருந்து விலகி, உள்ளூர் பிரச்சனைகளுக்கு முக்கியத்துவம் அளித்திருந்தாலே வெற்றி பெற்றிருக்க முடியும். அதனால் குடியரசு கட்சியினரின் தோல்விக்கு ட்ரம்பே முதன்மையான காரணம் என்று கூறப்படுகிறது.
ஈரான் போரினால் மிகக் கடுமையாக உயர்ந்த எரிபொருள் விலை, கடுமையான விலைவாசி உயர்வு மற்றும் பணவீக்கம் அமெரிக்க வாக்காளர்களிடையே ட்ரம்ப் மீது பெரும் அதிருப்தியை ஏற்படுத்தியுள்ளது. உள்நாட்டு மக்கள் பிரச்சனைகளைக் கண்டு கொள்ளாமல்,இந்தியா பாகிஸ்தான் போர் உட்பட எட்டுப் போர்களை நிறுத்தினேன் என்றும் தற்பெருமை பேசிய வந்த ட்ரம்ப்பின் அகந்தைக்கு, அமெரிக்க வாக்காளர்கள் அளித்த நேரடித் தீர்ப்பாகவே இந்த தேர்தல் முடிவுகள் பார்க்கப்படுகிறது.
ட்ரம்பின் தலைமையின் கீழ் பாரம்பரியமான செல்வாக்கு மாகாணங்களையும் இழந்துள்ள குடியரசு கட்சியும், ‘அரசியல் ரீதியாக யாராலும் வீழ்த்த முடியாதவர்கள்’ என்ற பிம்பத்தை ஏற்படுத்திய MAGA இயக்கமும் பெரும் சரிவைச் சந்தித்துள்ளது.
சுமார் பத்தாண்டுகளாக ட்ரம்பின் ஆதிக்கத்தில் தனிநபர் விசுவாசத்தாலும், ஒருவித வழிபாட்டு கலாச்சாரத்தாலும் கட்டுண்டு கிடந்த குடியரசுக் கட்சிக்குளேயே இனி கருத்து மோதல்கள் உருவாகும் என்று எதிர்பார்க்கப் படுகிறது.
சொல்லப்போனால், ட்ரம்ப் எனும் பிம்பம் ஒரு பாதுகாப்புக் கவசமாக இருப்பதற்குப் பதிலாக, ஒரு அரசியல் சுமையாகவே குடியரசு கட்சிக்கு மாறியுள்ளது.
