புற்றுநோய் சிகிச்சைக்கான 543 வகை மருந்துகளின் அதிகபட்ச சில்லறை விலையை தேசிய மருந்து விலை நிர்ணய ஆணையம் குறைத்துள்ளது. இதனால், முக்கிய மருந்துகளின் விலை 70 முதல் 93 சதவீதம் வரை குறைகிறது.
இந்த விலைக் குறைப்பு இன்று முதல் அமலுக்கு வருகிறது. அதன்படி, மார்பகப் புற்றுநோய் சிகிச்சைக்குப் பயன்படுத்தப்படும் ‘பால்போசிக்லிப்’ மருந்தின் விலை 40 ஆயிரத்து 421 ரூபாயிலிருந்து 2 ஆயிரத்து 720 ரூபாயாகக் குறைக்கப்பட்டுள்ளது.
அதேபோல், கீமோதெரபி சிகிச்சைக்குப் பயன்படுத்தப்படும் ‘தியோடெபா’ மருந்தின் விலை 80 ஆயிரத்து 72 ரூபாயிலிருந்து 7 ஆயிரத்து 150 ரூபாயாகக் குறைந்துள்ளது. புற்றுநோய் மருந்து விற்பனை நிறுவனங்களின் வர்த்தக லாப வரம்பை அதிகபட்ச சில்லறை விலையில் 30 சதவீதமாக நிர்ணயிக்கும் நடவடிக்கையின் ஒரு பகுதியாக இந்த விலைக் குறைப்பு மேற்கொள்ளப்பட்டுள்ளது.
இருப்பினும், ‘ரிபோக்சிக்லிப்’ உள்ளிட்ட சில முக்கிய மருந்துகளின் விலையில் மாற்றம் செய்யப்படவில்லை.
