மதம் மாறியவர்களுக்கு இடஒதுக்கீடு வழங்குவது தொடர்பாக மேல்முறையீடு செய்யும் முடிவை தமிழக அரசு கைவிட வேண்டும் என இந்து முன்னணி மாநில தலைவர் காடேஸ்வரா சுப்பிரமணியன் வலியுறுத்தியுள்ளார்.
இது தொடர்பாக அவர் வெளியிட்டுள்ள அறிக்கையில், மதம் மாறிய ஒருவர், மதமாற்றத்தின் அடிப்படையில் வேறு சமூகப் பிரிவில் இடஒதுக்கீடு கோர முடியாது என நீதிமன்றங்கள் தெரிவித்துள்ளதாகவும், தமிழக அரசு மீண்டும் மேல்முறையீடு செய்ய முயற்சிப்பது அரசியல் சாசனத்துக்கும் சமூகநீதிக்கும் எதிரானது எனவும் குறிப்பிட்டுள்ளார்.
சிறுபான்மையினர் கல்வி நிறுவனங்களில் இந்துக்களுக்கு இடஒதுக்கீடு வழங்குவது தொடர்பான முந்தைய அரசின் முயற்சியை எதிர்த்தவர்கள், தற்போது மதம் மாறியவர்களுக்கான இடஒதுக்கீட்டுக்கு ஆதரவாகச் செயல்படுவது ஏன் என கேள்வி எழுப்பியுள்ளார்.
இந்துக்கள் தங்களுக்கு இழைக்கப்படும் துரோகத்தை புரிந்து கொண்டு அரசியலுக்கு அப்பாற்பட்டு வாக்களிக்க முடிவு செய்ய வேண்டும் எனவும் கூறியுள்ளார். மேலும், மதம் மாறியவர்களுக்கு இடஒதுக்கீடு வழங்குவது தொடர்பாக மேல்முறையீடு செய்ய முடிவை தமிழக அரசு கைவிட வேண்டும் என வலியுறுத்தியுள்ளார்.
