தீப ஒளி திருநாளாம் தீபாவளி பண்டிகை என்பது ஒவ்வொருவரின் வாழ்விலும் மறக்கமுடியாத வாழ்வின் ஒரு அங்கமாக விளங்கும். திருமணமான தம்பதிகளுக்கு முதல் ஆண்டில் வரும் தலை தீபாவளி தனிச்சிறப்பு அது குறித்த சிறப்பு செய்தி தொகுப்பினை தற்போது பார்க்கலாம்….
தலை தீபாவளி நாளில் மருமகனை மகனாக நினைத்து தனது மனைவியின் குடும்பத்தார் அழைத்து அவர்களுக்கு தலை தீபாவளிக்கான சீரும், விருந்தும் வழங்குவது மரபு….. புத்தாடை, ஆபரணம் என வசதிக்கேற்ப விலை உயர்ந்த பொருட்கள் சீர் வரிசையில் இடம் பெற்றாலும், அதில் முதலிடம் பிடித்து சீர் வழங்குபவர்களின் குணத்தை எடுத்துரைப்பது பலகாரங்கள் தான்.
தற்போதைய காலகட்டத்தில் வீடுகளில் தலை தீபாவளிக்காக அரிசி மாவை தயார் செய்து பலகாரத்தை சீர் வரிசையோடு வழங்கும் பழக்கம் மங்கிவரும் நிலையில் ரெடிமேடாக. அதிரசம், முறுக்குகளை வாங்கி கொடுக்கும் பழக்கத்திற்கு மாறிவிட்டனர். மதுரை செல்லூர் கண்மாய் கரையோர பகுதிகளில் ஆண்டு முழுவதிலும் அதிரசம், முறுக்கு, தட்டை போன்ற பலகாரங்களை சுட்டு விற்பனை செய்வதை 100க்கும் மேற்பட்டோர் குடிசைத் தொழிலாக இதனை செய்து வருகின்றனர்.
தற்போதைய காலத்திற்கு ஏற்றார் போல் முறுக்கு அதிரசம் உள்ளிட்ட தின்பண்டங்களை தயாரிப்பது உள்ளிட்டவை குறித்து யூடியுப், பேஸ்புக் இன்ஸ்டாகிராம் மூலமாக விளம்பரம் செய்து விற்பனை செய்து வருவதாக கூறுகின்றனர்.
ஒவ்வொருவரின் வாழ்வில் நீங்கா நினைவுகளை எடுத்துச் செல்லும் தலை தீபாவளி சீர்வரிசைக்கான அதிரசம் மற்றும் முறுக்குகளை தயாரிப்பு மற்றும் விற்பனை கடந்த ஆண்டை ஒப்பிடும்போது இந்த ஆண்டு சிறப்பாக நடைபெற்று வருவதாக அவர்கள் கூறுகின்றனர்
இன்றைய காலகட்டத்தில் எவ்வளவோ இனிப்பு வகைகள் ஸ்வீட் தயாரிக்கப்பட்டாலும், தமிழர்களின் பாரம்பரிய பலகாரமாக பார்க்கப்படும் அதிரசம் முறுக்குக்கான வரவேற்பு என்பது இன்றளவும் குறையாமல் இருந்து வருவதே இவர்களது தொழில் மேலும் சிறப்படைய முக்கிய காரணமாக இருந்து வருகின்றது.
தமிழ் ஜனம் செய்திகளுக்காக மதுரையில் இருந்து ஒளிப்பதிவாளர் நவீன்குமார் உடன் செய்தியாளர் நாகேந்திரன்
