தொடர் விடுமுறையையொட்டி கன்னியாகுமரியில் சுற்றுலாப் பயணிகள் குவிந்தனர்.
வாரத்தின் கடைசி நாட்கள் மற்றும் பண்டிகை கால விடுமுறை நாட்களில், குமரிக்குச் சுற்றுலாப் பயணிகள் வருகை அதிக அளவில் காணப்படும்.
இந்த நிலையில், இன்று ஞாயிற்றுக்கிழமை என்பதாலும், பள்ளிகளுக்கு காலாண்டு விடுமுறை என்பதாலும், இன்று கன்னியாகுமரிக்குச் சுற்றுலாப் பயணிகளின் வருகை அதிகரித்து உள்ளது. கன்னியாகுமரிக்கு தமிழகத்தின் பல்வேறு மாவட்டங்களில் இருந்தும், கேரளா, கர்நாடகா, ஆந்திரா உள்ளிட்ட வெளிமாநிலங்களில் இருந்தும், வெளிநாடுகளில் இருந்தும் ஏராளமான சுற்றுலாப் பயணிகள் வந்துள்ளனர்.
இன்று அதிகாலை கன்னியாகுமரி கடலில் சூரியன் உதயமாகும் காட்சியைக் காண முக்கடலும் சங்கமிக்கும் திரிவேணி சங்கமம் சங்கிலித்துறை கடற்கரை பகுதியிலும், கன்னியாகுமரி பகவதி அம்மன் கோவிலுக்குக் கிழக்கு பக்கம் உள்ள கிழக்கு வாசல் கடற்கரை பகுதியிலும் சுற்றுலாப் பயணிகள் திரண்டு உள்ளனர்.
மேலும், கன்னியாகுமரியில் உள்ள திருப்பதி வெங்கடாஜலபதி கோவில், விவேகானந்த கேந்திர வளாகத்தில் அமைந்துள்ள பாரத மாதா கோவில், இராமாயண தரிசன சித்திர கண்காட்சி கூடம், காந்தி நினைவு மண்டபம், காமராஜர் மணிமண்டபம், அரசு அருங்காட்சியகம், கலங்கரை விளக்கம், அரசு பழத்தோட்டம் சுற்றுச்சூழல் பூங்கா உள்பட அனைத்து சுற்றுலா தளங்களிலும் சுற்றுலாப் பயணிகளின் கூட்டம் அதிகமாக உள்ளது.
பொதுமக்களின் பாதுகாப்புக்காக கடலோர பாதுகாப்புக் குழுமக் காவல்துறை, சுற்றுலாக் காவல்துறை மற்றும் உள்ளூர் காவல்துறை அப்பகுதியில் பாதுகாப்புப் பணியில் ஈடுபட்டுள்ளனர்.
