இலங்கை மீனவர்கள் 5 பேர் கைது!

இந்திய எல்லைக்குள் அத்துமீறி நுழைந்த, இலங்கை மீனவர்கள் 5 பேரைக் கடலோரக் காவல் படையினர் அதிரடியாக கைது செய்தனர்.

இந்திய கடல் பகுதிக்குள் தீவிரவாதிகள் அத்துமீறி நுழைவதைத் தடுக்கவும், வெளிநாட்டவர்கள் அத்துமீறி நுழைவதைத் தடுக்கவும், தங்கம், கடல் அட்டை உள்ளிட்ட பொருட்களைக் கடத்தி செல்வதைத் தடுக்கவும், இந்திய கடலோரக் காவல்படையினர் ரோந்து கப்பலில் சென்று தீவிரக் கண்காணிப்பு பணியில் ஈடுபட்டு வருகின்றனர்.

இந்நிலையில், இந்திய கடலோர காவல் படையினர் ரோந்து பணியில் ஈடுபட்டு கொண்டிருந்த போது, இராமேஸ்வரம் அருகே தனுஷ்கோடி கடல் பகுதிக்குள் இலங்கை படகு ஒன்று அத்துமீறி நுழைந்து இருப்பதைப் பார்த்தனர். இதனை அடுத்து, விரைந்து சென்ற கடலோரக் காவல்படையினர் அந்த படகைச் சுற்றிவளைத்தனர்.

அதில், இலங்கையைச் சேர்ந்த 5 மீனவர்கள் இருந்தனர். இந்திய எல்லைக்குள் அத்துமீறி நுழைந்ததாக, அவர்கள் 5 பேரையும் கடலோர காவல்படையினர் கைது செய்தனர். இந்திய எல்லைக்குள் அத்துமீறி நுழைந்தது குறித்து அவர்களிடம் தீவிர விசாரணை நடத்தப்படுகிறது.