சபரிமலை செல்லும் ஐயப்ப பக்தர்களின் வசதிக்காக, சேலம், ஈரோடு, திருப்பூர் வழியாக விஜயவாடா, கோட்டயம் இடையே சிறப்பு இரயில்கள் இயக்கப்படுகின்றன.
உலகப் புகழ் பெற்ற சபரிமலை ஐயப்பன் திருக்கோவிலுக்கு, கேரளா மட்டுமல்லாது தமிழகம் உள்ளிட்ட பல்வேறு மாநிலங்களிலிருந்தும் பக்தர்கள் மாலை அணிந்து, இருமுடி கட்டிச் சென்று சுவாமி தரிசனம் செய்து வருகின்றனர்.
சபரிமலை ஐயப்ப சுவாமி திருக்கோவிலில், மண்டலக் காலத்தையொட்டி, மகரவிளக்கு பூஜைக்காகக் கடந்த 16-ம் தேதி கோவில் நடை திறக்கப்பட்டது. இதனையொட்டி, ஏராளமான பக்தர்கள் இருமுடி கட்டி சுவாமி தரிசனம் செய்து வருகின்றனர்.
பக்தர்களின் வசதிக்காக, தெற்கு இரயில்வே சார்பில் சிறப்பு இரயில்கள் இயக்கப்படுகின்றன. அந்த வகையில், விஜயவாடா – கோட்டயம் சிறப்பு இரயில் (வண்டி எண் – 07137) டிசம்பர் 1, 8, 29-ஆம் தேதிகள் மற்றும் ஜனவரி 12, 19-ஆம் ஆகிய தேதிகளில், விஜயவாடாவில் இருந்து இரவு 10.50 மணிக்குப் புறப்பட்டு மறுநாள் இரவு 10.00 மணிக்கு, கோட்டயத்தைச் சென்றடையும்.
இதேபோல், கோட்டயம் – விஜயவாடா சிறப்பு இரயில் (வண்டி எண் – 07138) டிசம்பர் 3, 10, 31-ஆம் தேதிகள் மற்றும் ஜனவரி 14, 21-ஆம் தேதிகளில், கோட்டயத்தில் இருந்து மதியம் 1.00 மணிக்குப் புறப்பட்டு, மறுநாள் மதியம் 2.00 மணிக்கு, விஜயவாடா சென்றடையும். சபரிமலை செல்லும் ஐயப்ப பக்தர்கள் இந்த இரயில் வசதியை பயன்படுத்தி கொள்ளலாம்.
