கடலூர் அருகே ஆயிரக்கணக்கான பிராய்லர் கோழிகள் திடீரென உயிரிழந்தது குறித்து கால்நடைத்துறையினர் ஆய்வு மேற்கொண்டு வருகின்றனர்.
கடலூர் மாவட்டம் நொச்சிக்காடு, நடுத்திட்டு, தியாகவல்லி உள்ளிட்ட பகுதிகளில் பண்ணைகளில் ஆயிரக்கணக்கான பிராய்லர் கோழிகள் வளர்க்கப்பட்டு வருகின்றன. இந்நிலையில், கடந்த அக்டோபர் 28-ஆம் தேதி முதல் கோழிகள் கொத்துக் கொத்தாக உயிரிழந்து வருவதாகவும், இதுவரை 20 ஆயிரத்துக்கும் மேற்பட்ட கோழிகள் இறந்துள்ளதாகவும் கூறப்படுகிறது. இது குறித்து தகவலறிந்த கால்நடைத் துறையினர், இறந்த கோழிகளின் மாதிரிகளைச் சேகரித்து ஆராய்ச்சி மையங்களுக்கு அனுப்பி வைத்துள்ளதாகவும், ஆய்வு முடிவுகள் வெளியான பின்னரே கோழிகள் உயிரிழந்ததற்கான காரணம் தெரியவரும் எனவும் பண்ணை உரிமையாளர்கள் கூறியுள்ளனர். கோழிகள் திடீரென உயிரிழந்ததால் பெரும் நஷ்டம் ஏற்பட்டுள்ளதாகவும், கால்நடைத் துறையினர் விரைந்து நடவடிக்கை எடுக்க வேண்டும் எனவும் கோழி வளர்ப்பாளர்கள் கோரிக்கை விடுத்துள்ளனர்.
