சேலம் மாநகராட்சியில் புதிய கட்டடங்கள் திறந்து வைக்கப்பட்ட விவகாரத்தில் திமுக கவுன்சிலருக்கும், மாநகராட்சி ஆணையருக்கும் கைகலப்பு ஏற்பட்டதாக தகவல் வெளியாகியுள்ளது
சேலம் மாநகராட்சியில் அமைச்சர் விஜய் தமிழன் பார்த்திபன் தலைமையில், 4 கோடியே 10 லட்சம் ரூபாய் மதிப்பில் கட்டப்பட்ட ஏழு அங்கன்வாடி மையங்கள் மற்றும் நகர்ப்புற ஆரம்ப சுகாதார நிலையக் கட்டடங்கள் திறக்க ஏற்பாடு செய்யப்பட்டிருந்தது. அம்மாப்பேட்டை மண்டலத்தில் கட்டப்பட்ட மேல்நிலைப்பள்ளியின் புதிய கட்டடத்தை அமைச்சர் விஜய் தமிழன் பார்த்திபன் திறந்து வைத்த நிலையில், இந்த நிகழ்ச்சிக்கு திமுக கவுன்சிலர் மற்றும் மேயருக்கு அழைப்பு விடுக்கவில்லை என குற்றச்சாட்டு எழுந்தது. இந்நிலையில், 43வது வார்டு புதிய கட்டடம் திறப்பு விழாவுக்கு மேயருக்கு அழைப்பு விடுக்காததைக் கண்டித்து கவுன்சிலர் குணசேகரன் கட்டடங்களை முன்கூட்டியே திறந்து வைத்ததுடன், மாநகராட்சி ஆணையர் லலித் ஆதித்ய நீலமேகத்துடன் கடும் வாக்குவாதத்தில் ஈடுபட்டுள்ளார். அப்போது, இருவருக்கும் கைகலப்பு ஏற்பட்டதாகவும் தகவல் வெளியாகியுள்ளது. இதனை அடுத்து, அந்த பகுதியில் போலீசார் குவிக்கப்பட்டு பாதுகாப்பு பலப்படுத்தப்பட்டுள்ளது.
