ஆந்திர மாநிலத்தில் 92 நகராட்சிகள் மற்றும் 13 மாநகராட்சி தேர்தலுக்கான வாக்குப்பதிவு விறுவிறுப்பாக நடைபெற்று வருகிறது.
ஆந்திர மாநிலத்தில் 92 நகராட்சிகள், 13 மாநகராட்சிகளுக்கான தேர்தல் காலை 7 மணிக்குத் தொடங்கியது. மொத்தம் 10 ஆயிரத்து 262 வேட்பாளர்கள் போட்டியிடும் நிலையில், 99 லட்சத்து 36 ஆயிரம் வாக்காளர்கள் வாக்களிக்க தகுதி பெற்றுள்ளனர்.
தேசிய ஜனநாயகக் கூட்டணி மற்றும் ஒய்.எஸ்.ஆர். காங்கிரஸ் இடையே கடும் போட்டி நிலவுகிறது.
இதற்கிடையே, கடப்பா மாவட்டத்தில் முன்னாள் முதலமைச்சர் ஜெகன்மோகன் ரெட்டியின் சொந்த ஊரான புலிவெந்துலாவில் அதிகாலையில் இரு தரப்பினரிடையே பயங்கர மோதல் ஏற்பட்டது. கற்கள் மற்றும் கட்டைகளால் தாக்கிக் கொண்டதில், 3 கார்கள், 5 ஸ்கூட்டர்கள், 2 டிராக்டர்கள் தீ வைத்து எரிக்கப்பட்டன.
இது குறித்து தகவலறிந்து வந்த போலீசார் வன்முறையில் ஈடுபட்டவர்களை விரட்டியடித்து பாதுகாப்பைப் பலப்படுத்தினர். மாநிலத்தின் பல்வேறு பகுதிகளிலும் சிறு மோதல்கள் ஏற்பட்டபோதிலும், வாக்குச்சாவடிகளில் வாக்குப்பதிவு தொடர்ந்து விறுவிறுப்பாக நடைபெற்று வருகிறது.
