தேசிய ஒற்றுமை தினத்தையொட்டி குஜராத்தில் பிரமாண்ட அணிவகுப்பு நிகழ்ச்சி நடைபெற்றது.
இந்தியாவின் இரும்பு மனிதர் என்று அழைக்கப்படும் சர்தார் வல்லபாய் படேலின் பிறந்தநாள், தேசிய ஒற்றுமை தினமாகக் கடைபிடிக்கப்படுகிறது. இதனையொட்டி குஜராத் மாநிலம் ஏக்தா நகரில் ஒற்றுமை தின விழா கோலாகலமாக நடைபெற்றது. இதில் பிரதமர் மோடி, காவல்துறையினர், பாதுகாப்பு படையினர், பொதுமக்கள் உட்பட ஆயிரக்கணக்கானோர் பங்கேற்று உறுதிமொழி எடுத்துக் கொண்டனர்.
இதையடுத்து காவல்துறை மற்றும் பாதுகாப்பு படையினரின் பிரம்மாண்ட அணிவகுப்பு நிகழ்ச்சி நடைபெற்றது. இசைக்கு ஏற்ப நடைபெற்ற கம்பீரமான அணிவகுப்பு மரியாதையை பிரதமர் மோடி ஏற்றுக் கொண்டார்.
தொடர்ந்து குஜராத் மாநிலத்தின் பாரம்பரியத்தை பறைசாற்றும் வகையில் அலங்கார ஊர்திகளின் அணிவகுப்பு நிகழ்ச்சி நடைபெற்றது. இதில் துவாரகாதீஷ் கோயில், சோமநாதர் கோயில், சூரியனார் கோயில் ஆகிய புனித தலங்களின் மாதிரிகள் இடம்பெற்றிருந்தன.
நக்சல் இல்லாத பாரதம் என்ற இலக்கை எடுத்துரைக்கும் வகையில் ஒற்றுமை தின விழாவில் நாடகம் அரங்கேற்றப்பட்டது. நக்சல்களால் பாதிக்கப்பட்ட 126 மாவட்டங்களை சேர்ந்த சுமார் 2 ஆயிரம் கலைஞர்கள் பங்கேற்றனர். இந்த நாடகத்தின் மூலம், பாதிக்கப்பட்ட பகுதிகளில் மக்கள் எதிர்கொண்ட சவால்கள், வன்முறையில் இருந்து மீண்டு அமைதி, பாதுகாப்பு மற்றும் நாட்டின் வளர்ச்சியை நோக்கி பயணித்த விதம் விவரிக்கப்பட்டது.
பின்னர், இந்தியாவின் பன்முகத்தன்மையை பறைசாற்றும் வகையில் 3 ஆயிரத்திற்கும் மேற்பட்ட குஜராத் கலைஞர்கள் உட்பட நாடு முழுவதிலும் இருந்து 5 ஆயிரம் கலைஞர்கள் கலை நிகழ்ச்சிகள் அரங்கேற்றினர்.
இதையடுத்து ராணுவம் மற்றும் பாதுகாப்பு படையினரின் சாகச நிகழ்ச்சி நடைபெற்றது. இருசக்கர வாகனங்களில் பல்வேறு சாகசங்களை செய்து வீரர்கள் பிரமிக்க வைத்தனர்.
தேசிய ஒற்றுமை தின விழாவில் வாண வேடிக்கை நிகழ்ச்சி களைகட்டியது. இதனை பிரதமர் உட்பட அனைவரும் ஆர்வத்துடன் கண்டு களித்தனர்.
