தீபாவளி பலகாரங்களில் புதுமை : முறுக்கு முதல் லட்டு வரை சிறுதானியங்களில் விதவிதமான ருசி – சுவை தொகுப்பு!

தீபாவளியையொட்டி புதுக்கோட்டையில் சிறுதானியங்கள் மற்றும் பாரம்பரிய அரிசி வகைகளைக் கொண்டு விதவிதமான பலகாரங்கள் தயாரிக்கப்பட்டு வருகின்றன. மைதா, வெள்ளைச் சர்க்கரை உள்ளிட்டவற்றைத் தவிர்த்து தயாரிக்கப்படும் இந்தப் பலகாரங்களுக்கு மக்களிடையே வரவேற்பு அதிகரித்துள்ளது. இதுகுறித்து விரிவாக பார்க்கலாம் இந்தச் செய்தித் தொகுப்பில்…

1,364 இயற்கை விவசாயிகளை உள்ளடக்கிய புதுக்கோட்டை இயற்கை வேளாண் உற்பத்தியாளர்கள் சங்கத்தில், இயற்கை முறையில் விளைவிக்கப்பட்ட சிறுதானியங்கள் மற்றும் பாரம்பரிய அரிசி ரகங்களைக் கொண்டு, விதவிதமான பலகாரங்கள் தயாரிக்கும் பணி மும்முரமாக நடைபெற்று வருகிறது.

குறிப்பாக வரகு, தினை, சாமை, கம்பு, கேழ்வரகு, குதிரைவாலி போன்ற சிறுதானியங்களையும், மாப்பிள்ளைச் சம்பா, கவுனி, தூயமல்லி போன்ற பாரம்பரிய அரிசி வகைகளையும் கொண்டு இன்றைய தலைமுறையினருக்கு பிடித்தமான சுவையில் பலகாரங்கள் தயாரிக்கப்படுகின்றன.

இந்த ஆண்டு புதுவரவாக, பாரம்பரிய அரிசி வகையான ரத்தசாலி அரிசியைக் கொண்டு முறுக்கு, தட்டை, மிக்சர், லட்டு, ரிப்பன் பக்கோடா உள்ளிட்ட பலகாரங்களை வேளாண் உற்பத்தியாளர் சங்கத்தினர் அறிமுகப்படுத்தியுள்ளனர்.

இனிப்பு வகைகளில் வெள்ளைச் சர்க்கரைக்குப் பதிலாக நாட்டுச் சர்க்கரை, வெல்லம், கருப்பட்டி போன்றவற்றைப் பயன்படுத்துவதாகவும், செயற்கை நிறமூட்டிகள் மற்றும் சுவையூட்டிகள் சேர்க்காமல், தரமான மூலப்பொருட்களைக் கொண்டு பலகாரங்கள் தயாரிப்பதாகவும் சங்க நிர்வாகிகள் கூறுகின்றனர்…

இந்தத் தீபாவளிக்கு, கடந்த ஆண்டைவிட சுமார் 20 சதவீதம் கூடுதலாக ஆர்டர்கள் கிடைத்துள்ளதாகவும், மூலப்பொருட்களின் விலை உயர்வு விற்பனையில் தாக்கத்தை ஏற்படுத்துவதாகவும் இயற்கை வேளாண் உற்பத்தியாளர்கள் சங்க நிர்வாகிகள் தெரிவிக்கின்றனர். ஸ்வீட் தயாரிப்பில் பத்துக்கும் மேற்பட்ட பெண்கள் ஈடுபட்டு வருவதால், அவர்களுக்கு வேலைவாய்ப்பு கிடைப்பதுடன், இயற்கை விவசாயிகள் உற்பத்தி செய்யும் பொருட்களுக்கும் சந்தை வாய்ப்பு உருவாகியுள்ளது.

ஆன்லைன் மூலம் பல்வேறு மாநிலங்களில் இருந்தும் ஆர்டர் வருவதாக கூறும் நிர்வாகிகள், தமிழ்நாடு மட்டுமின்றி கர்நாடகா, கேரளா, ஆந்திரா, தெலங்கானா, மகாராஷ்டிரா, டெல்லி உள்ளிட்ட பல பகுதிகளுக்கும் பலகாரங்களை அனுப்பி வருகின்றனர்.

சிறுதானியங்கள் மற்றும் பாரம்பரிய அரிசி வகைகளைக் கொண்டு பலகாரங்கள் தயாரிப்பதன் மூலம், நமது பாரம்பரிய உணவுப் பழக்கத்தை அடுத்த தலைமுறைக்குக் கொண்டு செல்லும் முயற்சியில் ஈடுபட்டுள்ளது புதுக்கோட்டை இயற்கை வேளாண் உற்பத்தியாளர்கள் சங்கம். இந்த முயற்சி, நமது பாரம்பரிய உணவுகளை மீட்டெடுப்பதோடு, இயற்கை விவசாயிகளின் உழைப்புக்கு உரிய அங்கீகாரத்தையும், அவர்களது வாழ்வாதாரத்தை மேம்படுத்துவதற்கான வாய்ப்பையும் ஏற்படுத்தும் என்பதில் சந்தேகமில்லை.

..