தமிழகத்தில் அடுத்தாண்டு கோடை காலத்தில், மின் தேவை எவ்வளவு இருக்கும் என்பது குறித்த விபரங்களை, மத்திய மின்துறை வெளியிட்டுள்ளது.
தமிழகத்தில் தினசரி மின் தேவை சராசரியாக 16 ஆயிரம் மெகாவாட்டாக உள்ள நிலையில், ‘எல் நினோ’ காலநிலை மாற்றம் காரணமாக கடந்த ஜூலை 14 அன்று 21 ஆயிரத்து 724 மெகாவாட்டாக உயர்ந்து புதிய உச்சத்தை தொட்டது.
இம்மாத தொடக்கத்தில் சராசரியாக, 21 ஆயிரம் மெகா வாட் என்ற அளவில் இருந்தது.இதை பூர்த்தி செய்யும் அளவுக்கு மின்சாரம் கையிருப்பு இல்லாததால், மின் பற்றாக்குறை ஏற்பட்டது.
பல இடங்களில் மின் வெட்டு செய்யப்பட்ட நிலையில், நெருக்கடியை சமாளிக்க வெளிசந்தையில், மூன்றாயிரத்து 500 மெகா வாட் மின்சாரத்தை, மின் வாரியம் வாங்கியது.
இந்நிலையில், அடுத்த ஆண்டில் ஜனவரி முதல் அக்டோபர் மாதம் வரை தமிழக மின் தேவை எவ்வளவு இருக்கும் என்ற விபரங்களை, மத்திய மின் துறை வெளியிட்டுள்ளது.
தினமும் மாலையில், 1,388 மெகா வாட் முதல், 6,162 மெகா வாட் வரை மின் பற்றாக்குறை ஏற்படும் என்றும், அதை பூர்த்தி செய்ய நடவடிக்கை எடுக்குமாறும், மத்திய மின் துறை அறிவுறுத்தியுள்ளது
