தஞ்சை அருகே கோயில் நிலத்தில் உள்ள ஈ.வெ.ரா சிலையை அகற்ற உயர்நீதிமன்ற மதுரை அமர்வு உத்தரவிட்டுள்ளது.
மதுரையை சேர்ந்த ரவிக்குமார் தாக்கல் செய்த பொது நல வழக்கில்,
தஞ்சை மாவட்டம் திருவையாறு கண்டியூர் பிரம்ம சிரகண்டீஸ்வரர் கோயில் முன்பாக, இந்து சமய அறநிலையத்துறையிடம் முன் அனுமதி பெறாமல் ஈ.வெ.ரா சிலை நிறுவப்பட்டதாக தெரிவிக்கப்பட்டுள்ளது.
கடந்த 1990ம் ஆண்டு திராவிடர் கழக அமைப்பு சார்பில் சிலை நிறுவப்பட்டதாகவும், கோயிலுக்கு சொந்தமான நிலத்தில் சிலைக்கு அருகில் கட்சிக்கொடிகளும் நிறுவப்பட்டுள்ளதாகவும் மனுவில் தெரிவிக்கப்பட்டது.
எனவே, கோயில் முன்பாக நிறுவப்பட்டுள்ள ஈ.வெ.ரா சிலையை அகற்ற உத்தரவிட வேண்டும் என்றும் வலியுறுத்தப்பட்டது.
இந்த வழக்கு நீதிபதிகள் வேல்முருகன், கே.கே.ராமகிருஷ்ணன் அமர்வு முன்பாக விசாரணைக்கு வந்தது. அப்போது, சிலையை அங்கு வைக்கும் போதே எதிர்ப்பு தெரிவிக்கப்பட்டதாக கோயில் நிர்வாகம் தரப்பில் கூறப்பட்டது.
இதையடுத்து நான்கு வாரத்திற்குள் தஞ்சை மாவட்ட ஆட்சியர் பாதுகாப்பாக சிலையை அகற்ற நீதிபதிகள் உத்தரவிட்டனர்.
