உள்நாட்டிலேயே தயாரிக்கப்பட்ட அதிநவீன வழிகாட்டுதல் செயற்கைக்கோளான ‘என்.வி.எஸ் – 03’ செயற்கைக் கோளை சுமந்துகொண்டு, ஜி.எஸ்.எல்.வி – எப்18 ராக்கெட், இரவு 11.51 மணிக்கு விண்ணில் வெற்றிகரமாகச் சீறிப்பாய்ந்தது.
ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி ஆய்வு மையத்தின் இரண்டாவது ஏவுதளத்தில் இருந்து, ஜி.எஸ்.எல்.வி. ராக்கெட் கம்பீரமாக விண்ணை நோக்கிப் பாய்ந்தது.
புறப்பட்ட சில நிமிடத்திலேயே NVS 03 செயற்கைகோளுடன் புவி ஒத்திசைவு சுற்றுப்பாதையில் திட்டமிட்டபடி ஜி.எஸ்.எல்.வி. ராக்கெட் நிலைநிறுத்தப்பட்டது. முன்னதாக 2,250 கிலோ எடையுள்ள என்.வி.எஸ்-03 செயற்கைக்கோளை சுமந்து கொண்டு ராக்கெட் சீறிப் பாய்ந்ததும், கட்டுப்பாட்டு மையத்தில் இருந்த இஸ்ரோ விஞ்ஞானிகள் உற்சாகமாக கரவொலி எழுப்பி தங்களது மகிழ்ச்சியைப் பரிமாறிக் கொண்டனர்.
ஆரம்பக் காலங்களில் பல்வேறு தொழில்நுட்ப சவால்களைச் சந்தித்த ஜி.எஸ்.எல்.வி., தொடர் வெற்றிகள் மூலம் தற்போது அபார வளர்ச்சி கண்டுள்ளது. சுமார் 50 மீட்டர் உயரமும், 420 டன் எடையும் கொண்ட இந்த ராக்கெட்டின் 20-ஆவது வரலாற்றுப் பயணம் இதுவென விஞ்ஞானிகள் பெருமிதம் தெரிவித்துள்ளனர்.
இந்தியாவுக்கு ஏற்கெனவே 3 வழிகாட்டி செயற்கைக்கோள்கள் உள்ள நிலையில், 4-ஆவதாக ஏவப்பட்டுள்ள என்.வி.எஸ் – 03 செயற்கைகோளின் ஆயுட்காலம் 12 ஆண்டுகள் என்பது குறிப்பிடத்தக்கது.
