தமிழ் மொழியால் அரசியல் தலைவர்கள் வளர்ந்தார்களே தவிர, தமிழை வளர்க்கவில்லை – ராம ஸ்ரீநிவாசன்

கடந்த 60 ஆண்டுகளில் அரசியல் தலைவர்கள் தமிழால் வளர்ந்தார்களே தவிர, தமிழை வளர்க்கவில்லை என பாஜக மாநிலச் செயலாளர் ராம ஸ்ரீநிவாசன் விமர்சித்துள்ளார்.

சென்னை தி.நகர் வாணி மஹாலில் தமிழ் மொழியின் தொன்மை, வளர்ச்சி மற்றும் எதிர்காலம் குறித்து ‘தமிழ் – நேற்று, இன்று, நாளை’ என்ற தலைப்பில் சிறப்பு நிகழ்ச்சி நடைபெற்றது.

இதில் பாஜக மாநிலச் செயலாளர் பேராசிரியர் ராம சீனிவாசன், முன்னாள் அமைச்சர் வைகைச்செல்வன் உள்ளிட்டோர் கலந்து கொண்டனர். அப்போது நிகழ்ச்சியில் பேசிய ராம சீனிவாசன், கடந்த 60 ஆண்டுகளில் தமிழின் பெயரால் அரசியல் செய்த தலைவர்கள், தமிழை வளர்க்காமல் தங்களை வளர்த்து கொண்டதாகக் குற்றம்சாட்டினார்.

தமிழ் மொழி அடையாள அரசியலுக்கு பயன்படுத்தப்பட்டதாகவும், அறிவியல் மற்றும் தொழில்நுட்ப துறைகளில் தமிழின் பயன்பாடு அதிகரிக்க வேண்டும் என அவர் கூறினார்.

மேலும், திருவள்ளுவருக்கு காவி உடை அணிவித்ததாக பாஜக மீது விமர்சனம் செய்துள்ளதாக கூறிய அவர், திமுக முன்னாள் பொதுச்செயலாளர் பேராசிரியர் அன்பழகன் எழுதிய நூலில் திருவள்ளுவர் காவி உடையுடன் இடம்பெற்றிருக்கும் புகைப்படம் உள்ளதாகவும் தெரிவித்தார்.