தீபாவளி போனஸ் மற்றும் 4 நாட்கள் விடுப்பு வழங்கக் கோரி, ஸ்ரீபெரும்புதூர் அருகே ராயல் என்ஃபீல்டு நிறுவனத்தில் 2 ஆயிரத்து 500-க்கும் மேற்பட்ட தொழிலாளர்கள் உள்ளிருப்புப் போராட்டத்தில் ஈடுபட்டுள்ளனர்.
காஞ்சிபுரம் மாவட்டம் வல்லம் வடகால் சிப்காட் பகுதியில் உள்ள ராயல் என்ஃபீல்டு நிறுவனத்தில், தீபாவளிக்கு இரண்டு நாட்கள் மட்டுமே விடுப்பு வழங்கப்படும் என்றும், போனஸ் வழங்கப்படாது என்றும் நிர்வாகம் தரப்பில் தெரிவிக்கப்பட்டதாகக் கூறப்படுகிறது. இதனால் அதிருப்தியடைந்த தொழிலாளர்கள், குடும்பத்தினருடன் பண்டிகையைக் கொண்டாட 4 நாட்கள் விடுப்பும், தீபாவளி போனஸும் வழங்க வலியுறுத்திப் போராட்டத்தில் ஈடுபட்டனர்.
மேலும், பணி முடிந்து வெளியேற முயன்ற தொழிலாளர்களின் பேருந்துகளைத் தடுத்து, நிறுவன நுழைவாயில் கதவையும் மூடினர். இதனால் அங்கு பரபரப்பு ஏற்பட்டதைத் தொடர்ந்து, போலீசார் குவிக்கப்பட்டு பாதுகாப்புப் பணியில் ஈடுபட்டுள்ளனர். கோரிக்கைகள் நிறைவேறும் வரை போராட்டம் தொடரும் என தொழிலாளர்கள் தெரிவித்துள்ளனர்.
