தீபாவளி பண்டிகையை முன்னிட்டு சிறப்புப் பேருந்துகளை தடையின்றி இயக்கும் வகையில், நவம்பர் 12ஆம் தேதி வரை போக்குவரத்துக் கழகத் தொழிலாளர்கள் விடுப்பு எடுக்கத் தடை விதிக்கப்பட்டுள்ளது.
தீபாவளி பண்டிகையை முன்னிட்டு தமிழக அரசுப் போக்குவரத்துக் கழகங்கள் சார்பில் 16 ஆயிரம் சிறப்புப் பேருந்துகள் இயக்கப்பட உள்ளன. இதற்காக ஓட்டுநர்கள், நடத்துநர்கள், தொழில்நுட்பப் பணியாளர்கள் மட்டுமின்றி அலுவலகப் பணியாளர்களுக்கும் விடுப்பு மறுக்கப்பட்டுள்ளது.
அத்தியாவசிய விடுப்பில் உள்ளவர்கள் தவிர, பிற விடுப்புகளில் இருப்பவர்கள் உடனடியாகப் பணிக்குத் திரும்பவும் அறிவுறுத்தப்பட்டுள்ளனர்.
மேலும், ஓய்வு மற்றும் பணி ஓய்வுக்கும் தடை விதித்து, அனைத்துப் பணிமனைகளுக்கும் சுற்றறிக்கை அனுப்பப்பட்டுள்ளதாக அதிகாரிகள் தெரிவித்துள்ளனர். மேலும், ஒவ்வொரு பணிமனை அறிவிப்பு பலகையிலும் விடுப்பு தடை குறித்த அறிவிப்புகள் இடம்பெற வேண்டும் என அதிகாரிகள் தெரிவித்துள்ளனர்.
