கம்பத்தில் ரேஷன் அரிசி கடத்தலைத் தடுக்கச் சென்ற சட்டமன்ற உறுப்பினர் ஜெகநாத் மிஸ்ரா மீது ஜீப்பை மோதிக் கொலை செய்ய முயன்ற சம்பவம் பரபரப்பை ஏற்படுத்தியுள்ளது.
தேனி மாவட்டத்தின் கம்பம், உத்தமபாளையம், போடி உள்ளிட்ட பகுதிகளில் இருந்து கேரளாவுக்கு ரேஷன் அரிசி கடத்தப்படுவதாகக் சட்டமன்ற உறுப்பினர் ஜெகநாத் மிஸ்ராவுக்கு பொதுமக்கள் தொடர்ந்து புகார் அளித்து வந்தனர். இந்நிலையில், கம்பம் மெட்டு காலனி, உதயா நகர் பகுதியில் உள்ள தென்னந்தோப்பில், சுமார் 35 மூட்டை ரேஷன் அரிசியுடன் ஜீப் நிறுத்தப்பட்டுள்ளதாக எம்எல்ஏவுக்கு தகவல் கிடைத்துள்ளது.
இதனடிப்படையில், அங்கு சென்ற எம்எல்ஏவைப் பார்த்த கடத்தல்காரர்கள் ஜீப்பை வேகமாக இயக்கியுள்ளனர். அப்போது அவர் மீது வாகனத்தை மோத முயன்றதாகவும், சுதாரித்துக் கொண்டதால் காயமின்றி உயிர் தப்பியதாகவும் தெரிவிக்கப்பட்டுள்ளது.
இதனை அடுத்து, சம்பவ இடத்திற்கு வந்து விசாரணை நடத்திய போலீசார், ஒருவரின் வீட்டில் பதுக்கி வைக்கப்பட்டிருந்த 36 மூட்டை ரேஷன் அரிசி, கடத்தலுக்குப் பயன்படுத்தப்பட்ட இரண்டு இருசக்கர வாகனங்கள் மற்றும் ஒரு ஆம்னி வேன் ஆகியவற்றை பறிமுதல் செய்தனர். மேலும், தப்பியோடியவர்களைப் பிடிக்க மலைச்சாலைப் பகுதிகளில் போலீசார் தீவிர வாகனச் சோதனையில் ஈடுபட்டுள்ளனர்.
