இந்தியாவில் நடைபெற்று வரும் புரோ கபடி தொடரில் நேற்று நடைபெற்ற போட்டியில் பாட்னா பைரேட்ஸ் அணி, தமிழ் தலைவாஸை 13 புள்ளிகள் வித்தியாசத்தில் வீழ்த்தியது.
இந்தியாவில் உள்ள மாநிலங்களுக்கிடையே நடைபெறும் கபடி லீக் தொடரில் மொத்தம் 12 அணிகள் பங்குபெற்று விளையாடி வருகின்றன.
பெங்கால் வாரியர்ஸ், பெங்களூரு புல்ஸ், தபாங் டெல்லி கே.சி, குஜராத் ஜெயண்ட்ஸ், ஹரியானா ஸ்டீலர்ஸ், ஜெய்ப்பூர் பிங்க் பாந்தர்ஸ், பாட்னா பைரேட்ஸ், புனேரி பல்டன், தமிழ் தலைவாஸ், தெலுங்கு டைட்டன்ஸ், யு மும்பா மற்றும் உ.பி. யோதாஸ் ஆகிய அணிகள் பங்குபெற்றுள்ளனர்.
இதில் நேற்று நடைபெற்ற 34வது போட்டியில் தமிழ் தலைவாஸ் மற்றும் பாட்னா பைரேட்ஸ் அணிகள் விளையாடின. இப்போட்டியானது சென்னையில் உள்ள நேரு உள்விளையாட்டு அரங்கத்தில் நடைபெற்றது.
தமிழ் தலைவாஸ் அணி இதுவரை விளையாடிய 4 போட்டிகளில் தலா 2 வெற்றி 2 தோல்வி என பெற்றுள்ளது. பாட்னா பைரேட்ஸ் அணி தொடர்ந்து 3 தோல்விகளை பெற்றுள்ளது. எனவே நேற்று நடைபெற்றப் போட்டி இரண்டு அணிகளுக்கும் முக்கியமான போட்டியாக திகழ்ந்தது.
இந்நிலையில் போட்டி தொடங்கிய சில நிமிடங்களில் பாட்னா அணி 9 – 3 என முன்னிலை பெற்றது. இருப்பினும் தமிழ் தலைவாஸ் அணி போராடி புள்ளிகளை பெற்று வந்தது இருப்பினும் ஆட்ட முடிவில் பாட்னா 46-33 என்ற புள்ளி கணக்கில் தமிழ் தலைவாஸை வீழ்த்தி வெற்றியை பதிவு செய்தது.
பாட்னா அணியில் உள்ள தமிழக வீரர் சுதாகர் 11 புள்ளிகள் பெற்று தன் அணியின் வெற்றியில் முக்கிய பங்கு வகித்தார். மேலும் நேற்று நடைபெற்ற மற்றொரு போட்டியில் அரியானா ஸ்டீலர்ஸ்-தெலுங்கு டைட்டன்ஸ் அணிகள் விளையாடின.
இந்த போட்டியில் தெலுங்கு டைட்டன்ஸ் அணி 37-36 என்ற புள்ளி கணக்கில் அரியானா ஸ்டீலர்ஸ் அணியை வீழ்த்தி திரில் வெற்றி பெற்றது.
