2008 ஆம் ஆண்டிலிருந்து மருத்துவமனை பிணவறைகளில் கேட்பாரற்று இருந்த 1,122 சடலங்களை விற்றதன் மூலம் கேரள அரசு ₹3.66 கோடி வருவாய் ஈட்டியுள்ளது.
கேரள மாநிலத்தில் அரசு மருத்துவமனைகளின் பிணவறைகளில் உரிமை கோரப்படாமல் கேட்பாரற்று கிடைத்த சடலங்களை 2008 ஆம் ஆண்டு முதல் கேரளா அரசு விற்பனை செய்து வருகிறது.
இதில் மொத்தமாக 1,122 சடலங்களை தனியார் மருத்துவக் கல்லூரிகளுக்கு கேரள அரசு வழங்கியுள்ளது. மருத்துவ மாணவர்களுக்கு நேரடி பயிற்சி அளிக்க மற்றும் தனியார் மருத்துவக் கல்லூரிகளுக்கு மாதிரிகளாக வழங்கி உள்ளதாக தகவல் வெளியாகி உள்ளது.
அதிலும் எர்ணாகுளம் பொது மருத்துவமனை தான் அதிகபட்ச உடல்களைக் கொடுத்துள்ளது. கடந்த 16 ஆண்டுகளில் அந்த ஒரு மருத்துவமனை மட்டும் 599 சடலங்களை விற்பனை செய்துள்ளது.
அடுத்து பரியாரம் மருத்துவக் கல்லூரி 166 உடல்களை ஒப்படைத்துள்ள நிலையில், திருச்சூர் மருத்துவக் கல்லூரி 157 சடலங்களையும் கோழிக்கோடு மருத்துவக் கல்லூரி மருத்துவமனை 99 சடலங்களையும் விற்பனை செய்துள்ளதாக தகவல் தெரிவிக்கிறது.
இதில் பதப்படுத்தி வைக்கப்பட்ட சடலம் ஒன்றுக்கு 40,000 ரூபாய்க்கும், பதப்படுத்தப்படாத சடலம் ஒன்றுக்கு 20,000 ரூபாய்க்கும் விற்றுள்ளது கேரள அரசு. இதில் மொத்தமாக 3.66 கோடி ரூபாய் கேரள அரசு வருவாய் ஈட்டியுள்ளதாக தகவல் வெளியாகி உள்ளது.
