மகளிர் பிரீமியர் லீக் டி20 கிரிக்கெட் தொடரின் நேற்றையப் போட்டியில் மும்பை இந்தியன்ஸ் அணி 7 விக்கெட்கள் வித்தியாசத்தில் வெற்றி பெற்றதன் மூலம் முதல் அணியாக பிளே ஆப் சுற்றுக்கு தகுதி பெற்றது.
இந்தியாவில் பெண்களுக்கான மகளிர் பிரீமியர் லீக் ( WPL ) நடைபெற்று வருகிறது. இந்த தொடரில் மும்பை இந்தியன்ஸ், டெல்லி கேப்பிடல்ஸ், உ.பி. வாரியர்ஸ், குஜராத் ஜெயன்ட்ஸ், ராயல் சேலஞ்சர்ஸ் பெங்களூரு ஆகிய 5 அணிகள் பங்கேற்றுள்ளன.
இந்த தொடரில் 16வது போட்டி நேற்று டெல்லி அருண் ஜெட்லி மைதானத்தில் நடைபெற்றது. இதில் மும்பை இந்தியன்ஸ் மற்றும் குஜராத் ஜெயன்ட்ஸ் அணிகள் விளையாடியது.
இதில் டாஸ் வென்ற குஜராத் அணி முதலில் பேட்டிங்கை தேர்வு செய்தது. அதன்படி முதலில் பேட்டிங் செய்த குஜராத் அணி 20 ஓவர்கள் முடிவில் 190 ரன்களை எடுத்தது.
இதில் அதிகபட்சமாக ஹேமலதா 74 ரன்களும், பெத் முனி 66 ரன்களும் எடுத்து ஆட்டமிழக்க பாரதி 21 ரன்களை எடுத்து ஆட்டமிழக்காமல் இருந்தார். மற்ற வீராங்கனைகள் சொற்ப ரன்களில் ஆட்டமிழந்தனர்.
இதனால் குஜராத் அணி 20 ஓவர்கள் முடிவில் 190 ரன்களை எடுத்தது. மும்பை அணியில் அதிகபட்சமாக சைகா 2 விக்கெட்களை வீழ்த்தினார். இஸ்மாயில், சாஜனா, மேத்யூஸ், பூஜா ஆகியோர் தலா 1 விக்கெட்டை வீழ்த்தினர்.
இதைத் தொடர்ந்து 191 ரன்கள் எடுத்தால் வெற்றி என்ற இலக்குடன் மும்பை அணி களமிறங்கியது. மும்பை அணியில் தொடக்க வீராங்கனையாக களமிறங்கிய யாஸ்திகா 49 ரன்கள் எடுத்து ஆட்டமிழந்து அரைசதத்தை தவறவிட்டார்.
மற்றொரு தொடக்க வீராங்கனையான மேத்யூஸ் 18 ரன்கள் எடுத்து ஆட்டமிழந்தார். பின்னர் களமிறங்கிய மும்பை அணியின் கேப்டன் ஹர்மன் ப்ரீத் 10 பௌண்டரீஸ் மற்றும் 5 சிக்சர்கள் என மொத்தமாக 48 பந்துகளில் 95 ரன்கள் எடுத்து கடைசிவரை ஆட்டமிழக்காமல் இருந்தார்.
இதனால் மும்பை இந்தியன்ஸ் அணி 19.5 ஓவர்களில் 3 விக்கெட்கள் 191 ரன்களை எடுத்து வெற்றி பெற்றது. இது மட்டுமின்று முதல் அணியாக பிளே ஆப் சுற்றுக்கு தகுதி பெற்றது மும்பை இந்தியன்ஸ் அணி.
மேலும் இந்த போட்டியில் ஆட்டநாயகி விருது 95 ரன்களை எடுத்து அணியை வெற்றி பாதைக்கு அழைத்து சென்ற மும்பை அணியின் கேப்டன் ஹர்மன் ப்ரீத்துக்கு வழங்கப்பட்டது.
