ஸ்விட்சர்லாந்தில் உள்ள ஸ்டாட்லர் நிறுவனம் தொடர்ந்து 46 மணி நேரம் ஹைட்ரஜன் எரிபொருள் ரயிலை இயக்கி கின்னஸ் சாதனை படைத்துள்ளது.
ஸ்விட்சர்லாந்தில் ஸ்டாட்லர் என்ற நிறுவனம் ஒன்று ஹைட்ரஜன் எரிபொருள் பயணிகள் ரயிலை உருவாக்கி இயக்கி வருகிறது. இந்த ஹைட்ரஜன் எரிபொருள் பயணிகள் ரயில் தற்போது கின்னஸ் சாதனை ஒன்றை படைத்துள்ளது.
அதாவது இந்த ஹைட்ரஜன் ரயில் இரண்டு நாள் எங்கும் நிற்காமல் பயணம் செய்து இந்த கின்னஸ் சாதனையை படைத்துள்ளது.
ஸ்டாட்லர் நிறுவனம் தனது ஹைட்ரஜன் எரிபொருள் ரயிலை முதன் முதலில் பெர்லினில் 2 ஆண்டுகளுக்கு ஒரு முறை நடத்தப்படும் வர்த்தக கண்காட்சியில் அறிமுகப்படுத்தியது.
அறிமுகப்படுத்திய பின்னர் அந்த ரயில் பல முறை சோதனை நடத்தியது.இந்த சோதனைகளுக்குப் பிறகு ஒரு முழு ஹைட்ரஜன் டேங்க் மூலம் 1,741 மைல்கள் அதாவது 2,803 கிலோ மீட்டர் பயணம் செய்துள்ளது.
மார்ச் 20 ஆம் தேதி மாலை தொடங்கிய இந்த பயணம் இரவு மற்றும் அடுத்த நாள் முழுவதும் எனத் தொடர்ந்து 46 மணி நேரம் இயங்கி இந்த சாதனை படைத்துள்ளது.
மேலும், இது எங்களின் சிறந்த செயல் திறனைக் காட்டுகிறது என ஸ்டாட்லர் நிறுவன துணைத் தலைவர் டாக்டர்.அன்ஸ்கர் ப்ரோக்மேயர் கூறியுள்ளார்.
இதுகுறித்து அவர் “இந்த உலக சாதனையானது எங்கள் ஹைட்ரஜன் ரயிலின் சிறந்த செயல் திறனைக் காட்டுகிறது. இது மகத்தான சாதனை ஆகும். மற்றொரு உலக சாதனை படைத்ததில் நாங்கள் பெருமை அடைகிறோம்” என்று கூறினார்.
