வாரணாசியில், விவசாயிகள் நிதியுதவித் திட்டத்தின்கீழ் 17-ஆவது தவணையாக 20 ஆயிரம் கோடி ரூபாயை பிரதமர் நரேந்திர மோடி விடுவித்துள்ளார்.
பிரதமராக பதவியேற்றதைத் தொடர்ந்து முதல்முறையாக தனது சொந்த தொகுதியான உத்தரபிரதேச மாநிலம் வாரணாசிக்கு நரேந்திர மோடி சென்றார்.
அங்கு நடைபெற்ற நிகழ்ச்சியில், விவசாயிகள் நிதியுதவித் திட்டத்தின்கீழ் 17-ஆவது தவணையாக 20 ஆயிரம் கோடி ரூபாயை பிரதமர் விடுவித்தார். இதன் மூலம் 9 கோடியே 26 லட்சம் விவசாயிகள் பயன்பெறவுள்ளனர்.
மேலும், ‘வேளாண் தோழிகள்’ திட்டத்தின்கீழ் மகளிா் சுய உதவிக் குழுக்களைச் சோ்ந்த 30 ஆயிரம் பெண்களுக்கு பிரதமர் மோடி சான்றிதழ்களை வழங்கினார்.
பின்னர் நிகழ்ச்சியில் பேசிய பிரதமர் மோடி, வாரணாசி மக்கள் எம்.பி.யை மட்டுமல்லாமல், பிரதமரையே தேர்ந்தெடுத்ததாக குறிப்பிட்டார். மக்களவைத் தேர்தலில் 31 கோடி பெண்கள் வாக்களித்ததை நினைவுக்கூர்ந்த பிரதமர், உலகிலேயே இந்தியாவில்தான் அதிகளவிலான பெண்கள் வாக்களித்ததாகவும், இந்த எண்ணிக்கை கிட்டத்தட்ட அமெரிக்க மக்கள் தொகைக்கு சமம் என்றும் தெரிவித்தார்.
ஜனநாயக நாட்டில் தொடர்ந்து மூன்று முறை ஒரே கட்சி ஆட்சிக்கு வருவது அரிது என்றும், தேர்தல் வரலாற்றில் 60 ஆண்டுகளுக்குப் பின்னர் பாஜக அரசு ஹாட்ரிக் சாதனை படைத்திருப்பதாக பிரதமர் மோடி கூறியுள்ளார்.
தொடர்ந்து வாரணாசி தசாசுவமேத் படித்துறையில் பிரதமர் மோடி கங்கை நதிக்கு ஆரத்தி எடுத்து வழிபட்டார். அப்போது உத்தர பிரதேச முதல்வர் யோகி ஆதித்யநாத் உடனிருந்தார்.
பின்னர் காசி விஸ்வநாதர் கோயிலில் பிரதமர் மோடி மனமுருகி பிரார்த்தனை செய்தார்.
