அரசியலமைப்பு சட்டம் குறித்து பேச காங்கிரசுக்கு அருகதை இல்லை என தமிழக பாஜக மாநிலத் தலைவர் அண்ணாமலை விமர்சித்துள்ளார்.
எமர்ஜென்சி தினத்தை நினைவுகூறும் வகையில், சென்னை தியாகராய நகரில் உள்ள கமலாலயத்தில் பாஜக சார்பில் கூட்டம் நடைபெற்றது.
இதில் அக்கட்சியில் மாநில தலைவர் அண்ணாமலை பங்கேற்று, எமர்ஜென்சி காலத்தில் மக்கள் சந்தித்த துயரங்கள் குறித்து பேசினார்.
அப்போது பேசிய அண்ணாமலை, எமர்ஜென்சி காலத்தில் நம் நாடு எப்படி இருந்தது என்பதை நினைவுகூர வேண்டும் எனவும், அரசியலமைப்பு சட்டம் குறித்து பேச காங்கிரசுக்கு அருகதை இல்லை எனவும் தெரிவித்தார்.
எமர்ஜென்சிக்கு பிறகு தேர்தலில் தோல்வி பயம் காரணமாக நாட்டை விட்டு வெளியேற எண்ணியவர் இந்திரா காந்தி எனவும், ஒருவேளை காந்தி குடும்பம் நாட்டை விட்டு வெளியேறியிருந்தால் நாடு முன்னேறி இருக்கும் எனவும் அண்ணாமலை தெரிவித்தார்.
மேலும், அரசியலமைப்பு சட்டத்தில் ஏற்படுத்திய திருத்தங்களை எண்ணி காங்கிரஸ் ஆட்சியை மக்கள் ஏற்கவில்லை எனவும், மோடி போன்ற மனப்பக்குவம் நிறைந்த தலைவர்களை எப்போதும் நாம் விட்டுவிடக்கூடாது எனவும் பாஜக மாநிலத் தலைவர் அண்ணாமலை வலியுறுத்தினார்.
