பிரான்ஸ் நாடாளுமன்றத் தேர்தலில் இடதுசாரி கூட்டணி அதிக இடங்களில் வெற்றி பெற்றுள்ளது. எனினும், இந்த தேர்தலில் எந்த ஒரு கட்சிக்கும் பெரும்பான்மை கிடைக்கவில்லை. எனவே, பிரான்சில் கூட்டணி ஆட்சி அமையும் என்று எதிர்பார்க்கப்படுகிறது. இது குறித்த ஒரு செய்தி தொகுப்பை பார்க்கலாம்.
பிரான்ஸ் உட்பட 27 நாடுகளை உள்ளடக்கிய ஐரோப்பிய நாடாளுமன்றத் தேர்தலில் பிரான்ஸ் அதிபர் இம்மானுவேல் மெக்ரான் கட்சி மிக குறைவான உறுப்பினர்களைப் பெற்றது . இதனை அடுத்து, அரசை கலைத்து விட்டு தேர்தலுக்கு அழைப்பு விடுத்தார் இம்மானுவேல் மெக்ரான்.
பிரான்ஸ் நாட்டில், கடந்த ஜூன் 30 மற்றும் ஜூலை 7 ஆம் தேதிகளில் இரண்டு கட்டங்களாக தேர்தல் நடைபெற்றது.
மொத்தமுள்ள 577 நாடாளுமன்றத் தொகுதிகளுக்கான தேர்தலில், ஆட்சி அமைப்பதற்கு 289 இடங்களில் வெற்றி பெறுவது கட்டாயமாகிறது.
இரண்டாம் உலகப் போருக்குப் பின், வலது சாரி கொள்கை உடைய மரைன் லீ பென்னின் தேசிய பேரணி கட்சி ஆட்சியைக் கைப்பற்றும் என்று பரவலாக எதிர்பார்க்கப் பட்டது. அதே போல் முதல் கட்டத் தேர்தலில் தீவிர வலதுசாரி கட்சியான தேசிய பேரணி கட்சி முன்னிலை பெற்றது.
இரண்டாம் கட்டத் தேர்தலுக்குப் பிந்தைய கருத்துக் கணிப்புக்களின்படி இடதுசாரி கூட்டணி 182 இடங்களில் வெற்றி பெற்றுள்ளது. பிரான்ஸ் அதிபர் இம்மானுவேல் மெக்ரானின் சென்ட்ரிஸ்ட் கட்சி 168 இடங்களில் வெற்றி பெற்று இரண்டாம் இடத்தில் உள்ளது. பெரிதும் எதிர்பார்க்கப்பட்ட வலது சாரி கட்சி 143 இடங்களைப் பெற்று மூன்றாம் இடத்துக்குத் தள்ளப்பட்டிருக்கிறது.
எந்த கட்சிக்கும் பெரும்பான்மை கிடைக்காத நிலையில், இடது சாரிகளுடன் கூட்டணி வைத்து அதிபர் இம்மானுவேல் மெக்ரான் புதிய அரசை அமைக்கலாம் என்று கூறப்படுகிறது.
இடது சாரி கூட்டணி கட்சித் தலைவர்களான , ஜீன் லக் மெலென்சாண் , ஒலிவர் ஃபேர் மற்றும் மரைன் டாண் டெலியர் ஆகிய மூவரும் பிரதமர் பதவிக்கு ஆசைப்படுவதால், பிரதமர் பதவிக்கு கடும் போட்டி நிலவுகிறது.
இதற்கிடையே, தற்போதைய பிரதமர் கேப்ரியேல் கடந்த திங்கள் கிழமை தமது பதவியை ராஜினாமா செய்வதாக அறிவித்தார். வரும் நாட்களில், நேட்டோ உச்சிமாநாட்டிற்காக வாஷிங்டனுக்குச் செல்லும் பிரான்ஸ் அதிபர் இமானுவேல் மெக்ரான், நாட்டின் அடுத்த பிரதமர் யார் ? என குறிப்பிட வில்லை. மேலும் புதிய அரசு அமையும் வரை புதிய பிரதமர் குறித்த அறிவிப்பை வெளியிடப்போவதில்லை என்று பிரான்ஸ் அதிபர் இம்மானுவேல் மெக்ரான் தெரிவித்துளளார்.
முன்னதாக, சுமார் ஒரு வார காலம், பிரான்ஸ் தெருக்களில் வன்முறைகளும், கலவரங்களும், போராட்டங்களில், கட்டுக்கடங்காமல் வெடித்தன.
இந்நிலையில்,தேர்தல் முடிவுகள் பிரான்ஸையே அதிர்ச்சிக்குள்ளாக்கி இருக்கிறது. தேர்தல் முடிவுகள் அறிவிக்கப்பட்டதைத் தொடர்ந்து, பாரீஸ் நகரம் எங்கும் வன்முறைப் போராட்டங்கள் அதிகரித்துள்ளன. ஆயிரக்கணக்கான வலதுசாரி எதிர்ப்பாளர்களும் இடதுசாரிக் கட்சியினரும் பாரிஸின் தெருக்களில் வெள்ளம் போல் புகுந்துள்ளனர்.
அதிகரித்து வரும் வன்முறையை கலைக்க போலீசார் கண்ணீர் புகை குண்டுகளை பயன்படுத்தினர். போராட்டக் காரர்களில் பலர் கைது செய்யப்பட்டுள்ளனர். இதற்கு பதிலடியாக, எதிர்ப்பாளர்களும் புகை குண்டுகளை வீசினர். இதனால் வன்முறை கட்டுக்கடங்காமல் உள்ளது.
இன்னும் சில நாடுகளில் ஒலிம்பிக் போட்டிகள் நடைபெற உள்ள நிலையில் , பிரான்ஸ் கலவர பூமி ஆகி இருக்கிறது.
முன்னெப்போதும் இல்லாத தேர்தல் முடிவுகள் மற்றும் அதைத் தொடர்ந்து ஏற்பட்ட அமைதியின்மை, இதெல்லாம், ஐரோப்பிய ஒன்றியத்தின் இரண்டாவது பெரிய பொருளாதார நாடான பிரான்சில் அரசியல் குழப்பத்தை ஏற்படுத்தியுள்ளது.
தேர்தல் முடிவுகள் அதிர்ச்சியை தந்தாலும், தேசிய பேரணி கட்சிக்கு மக்களின் ஆதரவு இருக்கிறது என்று கூறும் மரைன் லீ பென், மீண்டும் நான்காவது முறையாக 2027ம் ஆண்டில் அதிபர் தேர்தலில் போட்டியிடப் போவதாக அறிவித்திருக்கிறார்.
